ఎమ్మెల్సీ కవితకు బెయిల్ వచ్చేనా ?

 ఢిల్లీ లిక్కర్ స్కామ్ కేసులో అరెస్ట్ అయిన బీఆర్ఎస్ ఎమ్మెల్సీ కవిత మధ్యంతర బెయిల్ పిటిషన్‌పై ఇవాళ రౌస్‌ అవెన్యూ కోర్టులో విచారణ జరగబోతోంది. సీబీఐ ప్రత్యేక కోర్టు జడ్జి కావేరి బవేజా ఈ పిటిషన్‌ను విచారణ చేయబో తున్నారు. ఢిల్లీ లిక్కర్‌ స్కామ్‌, మనీలాండరింగ్‌ కేసులో మార్చి 26న కవిత మధ్యంతర బెయిల్ కోసం పిటిషన్‌ దాఖలు చేశారు. తన చిన్న కుమారుడికి పరీక్షలు ఉన్నందు వల్ల తనకు ఏప్రిల్‌ 16 వరకు మధ్యంతర బెయిల్‌ ఇవ్వాలని కవిత కోరారు. కవితకు మధ్యంతర బెయిల్‌పై ఇప్పటికే రౌస్ అవెన్యూ కోర్టు ఈడీని వివరణ కోరింది. కవితకు మధ్యంతర బెయిల్ ఇవ్వకూడదని ఈడీ కోరే అవకాశం ఉంది. కవిత బెయిల్‌ ఇస్తే సాక్షులను, ఆధారాలను ప్రభావితం చేస్తారని ఈడీ భావిస్తోంది. మరోవైపు కవితకు జైల్లో సదుపాయాలు కల్పన అంశంపై కూడా నేడు విచారణ జరిగే అవకాశం ఉంది. కవితకు జైల్లో సదుపాయాలు కల్పించడం లేదంటూ ఇటీవల కవిత తరపు న్యాయవాది కోర్టులో పిటిషన్‌ దాఖలు చేశారు. కవితకు ఇంటి భోజనం, నిద్రించడానికి మంచం, పరుపులు, చెప్పులు, బట్టలు, దుప్పట్లు, పుస్తకాలు, పెన్ను, పేపర్లు, మందులు తీసుకెళ్లేందుకు రౌస్‌ అవెన్యూ కోర్టు అనుమతించింది. కానీ తిహార్‌ జైలు అధికారులు అమలు చేయకపోవడంపై మరోసారి కోర్టును ఆశ్రయించారు కవిత.