గుజరాత్ లో అత్యాధునిక సముద్ర వంతెన

గుజరాత్ మౌలిక సదుపాయాల చరిత్రలో ఒక సువర్ణ అధ్యాయం చేరబోతోంది. సౌరాష్ట్ర, దక్షిణ గుజరాత్‌లోని లక్షలాది మంది ప్రజలు ఏళ్ల తరబడి పడుతున్న కష్టాల నుండి విముక్తి కల్పించేందుకు కేంద్ర ప్రభుత్వం ఒక అత్యంత ప్రతిష్టాత్మకమైన ప్రణాళికను ఆమోదించింది. కేంద్ర రోడ్డు రవాణా, రహదారుల మంత్రిత్వ శాఖ, ఖంభట్ గల్ఫ్ మీదుగా ఒక అద్భుతమైన, అత్యాధునిక సముద్ర వంతెనను నిర్మించే దిశగా కీలకమైన చర్యలు చేపట్టింది. ఈ అనుసంధానం జామ్‌నగర్-భావనగర్-భరూచ్ హై-స్పీడ్ కారిడార్‌లో ఒక ప్రధాన భాగంగా ఉంటుంది. ప్రస్తుతం, భావ్‌నగర్ నుండి భరూచ్ లేదా సూరత్‌కు ప్రయాణించడానికి బగోద్రా లేదా వడోదర మీదుగా సుదీర్ఘ మార్గం అవసరం. దీనికి సుమారు 7 నుండి 8 గంటల సమయం పడుతుంది. అయితే, ఈ కొత్త ఎక్స్‌ప్రెస్‌వే మరియు పీఎం గతి శక్తి ప్రాజెక్ట్ కింద ప్రతిపాదించిన సుమారు 30 కిలోమీటర్ల పొడవైన సముద్ర వంతెన పూర్తి అయితే, ఈ దూరాన్ని కేవలం 45 నిమిషాల నుండి  గంటలోపే చేరుకోవచ్చు.