ఎన్సీపీ వర్కింగ్‌ ప్రెసిడెంట్‌గా సుప్రియా సూలే

స్వతంత్ర, వెబ్ డెస్క్: నేషనలిస్ట్ కాంగ్రెస్ పార్టీ(ఎన్సీపీ) అధ్యక్షుడు శరద్ పవార్ కీలక నిర్ణయం తీసుకున్నారు. పార్టీ వర్కింగ్ ప్రెసిడెంట్లుగా తన కుమార్తె సుప్రియా సూలే, సీనియర్ నేత ప్రఫుల్ పటేల్‌ను నియమించారు. ముంబయిలో జరిగిన పార్టీ 25వ వ్యవస్థాపక దినోత్సవలో ఆయన ఈ ప్రకటన చేశారు. వర్కింగ్ ప్రెసిడెంట్‌గా సుప్రియా సూలేకు మహారాష్ట్ర, హర్యానా, పంజాబ్, లోక్ సభ కోఆర్డినేషన్ బాధ్యతలను అప్పగిచారు. అలాగే ప్రఫుల్ పటేల్ మధ్యప్రదేశ్, రాజస్థాన్, గోవా, గుజరాత్, జార్ఖండ్ వ్యవహారాలను చూసుకోనున్నారు. కీలక నేత అజిత్‌ పవార్‌ ఎదుటే ఈ ప్రకటన చేయడం గమనార్హం. ఎన్సీపీలో అజిత్ చీలక తెస్తారని కొన్ని రోజులుగా ప్రచారం జరుగుతున్న నేపథ్యంలో ఈ నియామకాలకు ప్రాధాన్యం ఏర్పడింది. కాగా గత నెలలోఎన్సీపీ చీఫ్ పదవికి రాజీనామా చేస్తున్నట్లు శరద్ పవార్ ప్రకటించిన విషయం తెలిసిందే. అయితే పార్టీ నేతలంతా ఆయన నిర్ణయాన్ని తీవ్రంగా వ్యతిరేకించడంతో ఆ నిర్ణయాన్ని వెనక్కి తీసుకున్నారు.