బెంగళూరులో ఎబోలా కలవరం… ఉగాండా మహిళ ఐసోలేట్

బెంగళూరు .. కెంపెగౌడ అంతర్జాతీయ విమానాశ్రయానికి నాలుగు రోజుల క్రితం వచ్చిన 28 ఏళ్ల ఉగాండా మహిళను ముందుజాగ్రత్త చర్యగా ఇందిరా నగర్ అంటువ్యాధుల ఆసుపత్రిలో ఐసోలేట్ చేశారు. ఎబోలా పరీక్ష కోసం ఆమె నమూనాలను సేకరించారు. ఆ మహిళలో జ్వరం వంటి స్పష్టమైన లక్షణాలేవీ కనిపించలేదని ఆరోగ్య శాఖ ముఖ్య కార్యదర్శి రిత్విక్ రంజనం పాండే తెలిపారు. . ఆమె లక్షణాల గురించి తమకు ఇంకా స్పష్టత లేదని… విమానాశ్రయ ఆరోగ్య సంస్థ అలసట వంటి కొన్ని లక్షణాలను గమనించి, నమూనా తీసుకోవాలని నిర్ణయించిందన్నారు. పరీక్షల కోసం నమూనాలను పుణెలోని నేషనల్ ఇన్‌స్టిట్యూట్ ఆఫ్ వైరాలజీకి పంపారు. ఉగాండా నుంచి వచ్చిన ఆ మహిళ మొదట ఒక హోటల్‌లో బస చేశారు. అయితే ఒళ్లు నొప్పుల వంటి తేలికపాటి లక్షణాలు కనిపించడంతో ఆమెను ప్రభుత్వ ఆసుపత్రిలో చేర్చారని ఆరోగ్య శాఖ అధికారులు తెలిపారు.ఆఫ్రికన్ దేశాలనుంచే వచ్చే ప్రయాణీకులపై ఓ కన్ను వేసి వుంచాలని ఆరోగ్య శాఖ అధికారులు అన్ని విమానాశ్రయ సిబ్బందిని హెచ్చరించారు. ప్రజలు అంతగా భయపడాల్సిన పని లేదని , దీనిపై సోషల్ మీడియాలో వస్తున్న కధనాలను నమ్మవద్దని ఆరోగ్య శాఖ ప్రజలను కోరింది.