- సూళ్లూరుపేట చెంగాలమ్మ ఆలయంలో ఇస్రో చైర్మన్ పూజలు
- ఎస్ఎస్ఎల్వీ -డీ 2 ప్రయోగం విజయవంతం కావాలని పూజలు
నెల్లూరు జిల్లా సూళ్ళూరుపేట చెంగాలమ్మ ఆలయంలో ఇస్రో చైర్మన్ సోమనాథ్ ప్రత్యేక పూజలు చేశారు. రేపు SSLV-D2 ప్రయోగం విజయవంతం కావాలని పూజలు నిర్వమించారు. ప్రయోగానికి ముందు ఆలయంలో పూజలు చేయడం ఆనవాయితీగా వస్తుంది. అనంతరం తిరుమల శ్రీవారిని దర్శించుకున్నారు.
SSLV-D2 ప్రయోగానికి ఈ అర్ధరాత్రి 2.48 గంటలకు కౌంట్ డౌన్ ప్రారంభం కానుంది. ప్రయోగానికి ముందు ఆరున్నర గంటల పాటు కౌంట్ డౌన్ కొనసాగనుంది. రేపు ఉదయం 9.18 గంటలకు SSLV -D2ఉపగ్రహం నింగిలోకి దూసుకెళ్లనుంది.
ఈ ఏడాదిలో మొదటి ప్రయోగానికి ఇస్రో సిద్ధమవుతోంది. వాహకనౌక ఇస్రోకు చెందిన 156.3 కిలోల బరువుగల ఈవో ఎస్-07 ఉపగ్రహంతో పాటు యూఎస్ఏలోని అంటారీస్ సంస్థకు చెందిన 11.5 కిలోల బరువు గల జూనూస్ -1, చెన్నై స్పేస్ కిడ్జ్ ఇండియా రూపొందించిన 8.7 కిలోల అజాది శాట్-2 కక్ష్యలోకి దూసుకెళ్లనుంది.
మార్చి నెలాఖరులో పీఎస్ఎల్వీ -C55 రాకెట్ ద్వారా 36 ఉపగ్రహాలను ప్రయోగించనున్నట్లు ఇస్రో చైర్మన్ సోమనాథ్ తెలిపారు. ఎస్ఎస్ఎల్వి -డీ 2 ప్రయోగం నేపథ్యంలో షార్లో భారీ భద్రతను ఏర్పాటు చేశారు. షార్ పరిసరాలలో విస్తృత తనిఖీలు నిర్వహిస్తున్నారు.
