అధికార తెలుగుదేశం పార్టీలో ఆధిపత్య పోరు తారాస్థాయికి చేరుకుంది. రాష్ట్రవ్యాప్తంగా అనేక నియోజకవర్గాల్లో నేతల మధ్య పచ్చగడ్డి వేస్తే భగ్గుమనే పరిస్థితి నెలకొంది. క్రమశిక్షణకు మారుపేరుగా ఉండే టీడీపీలో ఇప్పుడు వీధిన పడుతున్న గ్రూపు తగాదాలు పార్టీ క్యాడర్ను తీవ్ర అయోమయానికి గురిచేస్తున్నాయి. జిల్లాల ఇన్ఛార్జ్ మంత్రులు సైతం ఈ పంచాయతీలు తేల్చలేక చేతులెత్తేస్తుండటంతో క్షేత్రస్థాయిలో పరిస్థితి చేయి దాటిపోతోంది. ఇంతకీ తెలుగుదేశం పార్టీలో ముదిరిపాకాన పడుతున్న ఈ వర్గపోరుకు కారణం ఏమిటి? త్వరలో జరగనున్న స్థానిక సంస్థల ఎన్నికల వేళ ఈ కుమ్ములాటలు పార్టీకి ఎంత మేర నష్టం చేకూర్చబోతున్నాయి?
రాష్ట్రంలో అఖండ మెజారిటీతో అధికారంలోకి వచ్చిన తెలుగుదేశం పార్టీలో ఊహించని పరిణామాలు చోటుచేసుకుంటున్నాయి. పార్టీని క్షేత్రస్థాయిలో మరింత బలోపేతం చేయాల్సిన నాయకులు, ఎవరికి వారు గ్రూపులుగా విడిపోయి ఆధిపత్య పోరుకు దిగుతున్నారు. రాష్ట్రంలోని చాలా నియోజకవర్గాల్లో సీనియర్లకు, జూనియర్లకు మధ్య, అలాగే సిట్టింగ్ ఎమ్మెల్యేలకు, మాజీ ఇన్ఛార్జులకు మధ్య పచ్చగడ్డి వేస్తే భగ్గుమంటోంది. పార్టీలో ఎన్నడూ లేని విధంగా గొడవలు తారాస్థాయికి చేరుకోవడంతో సామాన్య కార్యకర్తలు తీవ్ర ఆవేదన చెందుతున్నారు. జిల్లాల్లో పార్టీ వ్యవహారాలను చక్కదిద్దాల్సిన ఇన్ఛార్జ్ మంత్రులు సైతం ఈ వివాదాల జోలికి వెళ్లడం లేదు. ఎవరి పక్షం వహిస్తే ఎలాంటి రాజకీయ పరిణామాలు ఎదుర్కోవాలో అన్న భయంతో మంత్రులు సైతం మనకెందుకులే అని మౌనం వహిస్తున్నారు. ఇటీవల ఘనంగా జరిగిన పార్టీ పండుగ మహానాడు వేదికగా కూడా ఈ వర్గ విభేదాలు బహిర్గతం కావడం పార్టీ అధిష్టానాన్ని సైతం ఆశ్చర్యానికి గురిచేసింది. నేతలు కనీసం ఒకరి ముఖం ఒకరు చూసుకునేందుకు సైతం ఇష్టపడని పరిస్థితులు తమ్ముళ్ల మధ్య నెలకొన్నాయి.
కోస్తాంధ్ర, రాయలసీమ ప్రాంతాల్లో ఈ గ్రూపు రాజకీయాలు అత్యంత తీవ్ర రూపం దాల్చాయి. ముఖ్యంగా నెల్లూరు జిల్లా ఆత్మకూరు నియోజకవర్గంలో సీనియర్ నేత, మంత్రి ఆనం రామనారాయణరెడ్డికి వ్యతిరేకంగా సొంత పార్టీలోని కన్నబాబు వర్గం బహిరంగంగానే అసమ్మతి గళం విప్పింది. కష్టకాలంలో పార్టీ జెండా మోసిన తమను పూర్తిగా పక్కనపెట్టి, ఎన్నికల ముందు వైసీపీ నుంచి వచ్చిన వారికే మంత్రి ఆనం పెద్దపీట వేస్తున్నారని కన్నబాబు వర్గీయులు తీవ్ర ఆరోపణలు చేస్తున్నారు. ప్రభుత్వ కార్యక్రమాలకు సైతం తమకు కనీస ఆహ్వానాలు అందడం లేదని వారు మండిపడుతున్నారు. ఇక కడప జిల్లా ప్రొద్దుటూరు నియోజకవర్గంలో పరిస్థితి మరింత దారుణంగా తయారైంది. స్థానిక ఎమ్మెల్యే వరదరాజులు రెడ్డికి, టీడీపీ మాజీ ఇన్ఛార్జ్ ప్రవీణ్ రెడ్డికి మధ్య ఆధిపత్య పోరు పరాకాష్టకు చేరుకుంది. ఈ రెండు వర్గాల మధ్య మాటల యుద్ధం కాస్తా చిలికి చిలికి గాలివానలా మారి ఏకంగా బాహాబాహీకి దారితీసింది. నడిరోడ్డుపై ఇరు వర్గాల కార్యకర్తలు దాడులకు దిగడం రాష్ట్రవ్యాప్తంగా పార్టీ పరువును బజారున పడేసింది. ఈ ఘటనలు క్షేత్రస్థాయిలో క్యాడర్ను తీవ్ర నిరాశకు గురిచేస్తున్నాయి.
కేవలం ఒకటీ రెండు జిల్లాలకే ఈ పరిణామాలు పరిమితం కాలేదు. రాయలసీమలోని అనంతపురం అర్బన్ నియోజకవర్గంలో ప్రస్తుత సిట్టింగ్ ఎమ్మెల్యేకు, పార్టీ మాజీ ఎమ్మెల్యేకు మధ్య ఏమాత్రం పొసగడం లేదు. ఇద్దరు నేతలు ఎవరికి వారే యమునాతీరే అన్నట్లుగా సొంత కుంపట్లు పెట్టుకుని వ్యవహరిస్తున్నారు. దీనివల్ల కిందిస్థాయి కార్యకర్తలు ఎవరి వెంట నడవాలో అర్థం కాక అయోమయంలో పడిపోయారు. అటు రాజధాని ప్రాంతమైన గుంటూరు, పల్నాడు జిల్లాల్లోనూ అచ్చం ఇలాంటి గ్రూపు రాజకీయాలే రాజ్యమేలుతున్నాయి. పార్టీ కార్యక్రమాలను సమిష్టిగా నిర్వహించాల్సిన నాయకులు, ఒకరిపై ఒకరు అధిష్టానానికి ఫిర్యాదులు చేసుకోవడానికే ఎక్కువ సమయం కేటాయిస్తున్నారు. ప్రభుత్వ పనుల్లో తమ వర్గానికి ప్రాధాన్యత దక్కలేదంటే, తమ వర్గానికి దక్కలేదని నేతలు పంతాలకు పోతున్నారు. ఇన్నాళ్లూ పార్టీ అధికారంలోకి వస్తే తమ కష్టాలు తీరుతాయని కలలు కన్న సామాన్య కార్యకర్తలు, ఇప్పుడు ఈ గ్రూపుల గోలతో విసిగిపోతున్నారు. నాయకుల మధ్య సమన్వయం తీసుకురావాల్సిన జిల్లా స్థాయి కమిటీలు సైతం పూర్తిగా నిర్వీర్యమైపోయాయన్న విమర్శలు బలంగా వినిపిస్తున్నాయి.
పార్టీకి కంచుకోట లాంటి ఉత్తరాంధ్ర ప్రాంతంలోనూ అసమ్మతి సెగలు తీవ్రస్థాయిలో రగులుకుంటున్నాయి. విశాఖపట్నం జిల్లాలో ఏకంగా ఒక సీనియర్ నేత, మాజీ మంత్రికి వ్యతిరేకంగా సొంత పార్టీలోని ఒక వర్గం తిరుగుబాటు బావుటా ఎగురవేసింది. పార్టీ నాయకత్వం ఎదుటే బహిరంగంగా పంచాయితి పెట్టి తమ అసంతృప్తిని వెళ్లగక్కడం ఉత్తరాంధ్ర రాజకీయాల్లో తీవ్ర చర్చనీయాంశంగా మారింది. ఆ మాజీ మంత్రి ఒంటెద్దు పోకడల వల్ల పార్టీకి తీవ్ర నష్టం జరుగుతోందని వారు అధిష్టానానికి ఆధారాలతో సహా ఫిర్యాదు చేశారు. శ్రీకాకుళం, విజయనగరం జిల్లాల్లోని పలు నియోజకవర్గాల్లో కూడా ద్వితీయ శ్రేణి నాయకత్వం రెండు వర్గాలుగా విడిపోయి ఘర్షణలకు దిగుతోంది. పైకి అంతా ప్రశాంతంగా కనిపిస్తున్నప్పటికీ, క్షేత్రస్థాయిలో పరిస్థితి మాత్రం నివురుగప్పిన నిప్పులా ఉందని పార్టీ సీనియర్ కార్యకర్తలు ఆవేదన చెందుతున్నారు. చిన్న చిన్న పదవుల కోసం, కాంట్రాక్టుల కోసం జరుగుతున్న ఈ పోరాటం అంతిమంగా పార్టీ పునాదులను కదిలిస్తోందని వారు హెచ్చరిస్తున్నారు. తక్షణమే ఈ విభేదాలకు అడ్డుకట్ట వేయకపోతే పార్టీ ప్రతిష్ట మరింత దిగజారే ప్రమాదం ఉందని విశ్లేషకులు స్పష్టం చేస్తున్నారు.
రాష్ట్రంలో త్వరలోనే స్థానిక సంస్థల ఎన్నికలు జరగబోతున్నాయి. పంచాయితీ, జెడ్పీటీసీ, మున్సిపల్ ఎన్నికలు ఏ రాజకీయ పార్టీకైనా భవిష్యత్ మనుగడకు అత్యంత కీలకం. ఇలాంటి సమయంలో నియోజకవర్గ స్థాయి నేతల్లో గొడవలు తారాస్థాయికి చేరుకోవడం పార్టీకి తీవ్ర నష్టం చేకూరుస్తుందని క్యాడర్ ఆందోళన చెందుతోంది. నాయకులు ఇలాగే కొట్లాడుకుంటే స్థానిక సంస్థల ఎన్నికల్లో ప్రతిపక్షాలకు అనవసరమైన అడ్వాంటేజ్ ఇచ్చినట్లు అవుతుందని కార్యకర్తలు గుర్తు చేస్తున్నారు. జిల్లా స్థాయి మంత్రులు, ఇన్ఛార్జులు ఈ సమస్యలను పరిష్కరించడంలో పూర్తిగా విఫలమైనందున, ఇప్పుడు అధిష్టానం నేరుగా రంగంలోకి దిగాల్సిన ఆవశ్యకత ఏర్పడింది. పార్టీ అధినేత, ముఖ్యమంత్రి చంద్రబాబు నాయుడు, అలాగే పార్టీ జాతీయ వర్కింగ్ ప్రెసిడెంట్ నారా లోకేశ్ తక్షణమే జోక్యం చేసుకోవాలని పార్టీ అభిమానులు ముక్తకంఠంతో కోరుతున్నారు. కఠిన నిర్ణయాలు తీసుకుని, క్రమశిక్షణ తప్పే నాయకులపై వేటు వేసి ఈ గ్రూపు రాజకీయాలకు ఫుల్ స్టాప్ పెట్టాలని డిమాండ్ చేస్తున్నారు. చంద్రబాబు, లోకేశ్ ల నేరుగా రంగ ప్రవేశం చేస్తేనే టీడీపీలో ఈ కుమ్ములాటలకు చెక్ పడుతుందని పొలిటికల్ వర్గాలు సైతం విశ్లేషిస్తున్నాయి.
