రాజకీయాల్లో ఏదైనా పార్టీ తరఫున ఎన్నికల్లో పోటీ చేయాలంటే.. ఏళ్ల తరబడి లీడర్ల చుట్టూ తిరగాలి. పార్టీ ఫండ్ సమర్పించుకోవాలి, అధిష్టానం ఆశీస్సులు పుష్కలంగా ఉండాలి. కానీ తెలంగాణ రాజకీయాల్లో ఒక పార్టీ మాత్రం ఈ పాత పద్ధతులకు స్వస్తి పలుకుతూ తమ రూటే సెపరేట్ అంటోంది. ఉద్యోగాల భర్తీకి నోటిఫికేషన్లు ఇచ్చినట్లుగా.. ఏకంగా కార్పొరేటర్ సీట్ల కోసం పబ్లిక్ నోటిఫికేషన్ జారీ చేసి సంచలనం సృష్టించింది. తన కంచుకోట అయిన హైదరాబాద్ పాతబస్తీ నుంచే మజ్లిస్ పార్టీ ఈ నయా పొలిటికల్ ట్రెండ్కు తెరతీసింది. ఇంతకీ పాతబస్తీలో మజ్లిస్ పార్టీ ఎందుకు ఈ కొత్త ట్రెండ్కు శ్రీకారం చుట్టింది? ఈ ఓపెన్ ఆఫర్తో ఎంఐఎం పార్టీకి లాభం జరుగుతుందా లేక పాత కాపుల నుంచి రెబల్స్ బెడద పెరుగుతుందా?
ఎన్నికల రాజకీయాల్లో ఎప్పుడూ ఒక కొత్త ఒరవడిని సృష్టించే మజ్లిస్ పార్టీ.. ఇప్పుడు గల్లీ లీడర్ల ఎంపికలోనూ ఒక సరికొత్త ట్రెండ్ సెట్ చేయబోతోంది. సాధారణంగా ఎన్నికల సమయంలో ప్రభుత్వ ఉద్యోగాలకు నోటిఫికేషన్లు రావడం, అభ్యర్థులు ఎంట్రన్స్ ఎగ్జామ్స్ రాయడం మనం నిత్యం చూస్తూనే ఉంటాం. కానీ ఒక రాజకీయ పార్టీ కార్పొరేటర్ సీటు కోసం అధికారికంగా పబ్లిక్ నోటిఫికేషన్ ఇవ్వడం అనేది భారతీయ రాజకీయాల్లోనే అత్యంత అరుదైన పరిణామం. హైదరాబాద్ పాతబస్తీ కేంద్రంగా రాజకీయాలు నెరిపే ఆల్ ఇండియా మజ్లిస్-ఏ-ఇత్తెహాదుల్ ముస్లిమీన్ (ఎంఐఎం) పార్టీ మొట్టమొదటిసారిగా ఈ వినూత్న ప్రయోగానికి శ్రీకారం చుట్టింది. ఎన్నికల షెడ్యూల్ వచ్చి, నామినేషన్ల గడువు ముగిసే ఆఖరి నిమిషంలో హడావుడిగా ఎవరో ఒకరికి టికెట్ ఇచ్చే సాంప్రదాయానికి పార్టీ అధినాయకత్వం స్వస్తి పలికింది. చేతులు కాలాక ఆకులు పట్టుకునే పరిస్థితి రాకుండా ఉండేందుకు, రాష్ట్ర ఎన్నికల సంఘం నుంచి అధికారిక నోటిఫికేషన్ రాకముందే దారుస్సలాం కేంద్రంగా అభ్యర్థుల వేటను అధికారికంగా ప్రారంభించింది.
పాతబస్తీ గల్లీల నుంచి మొదలైన ఎంఐఎం ప్రయాణం ఇప్పుడు ఢిల్లీ దాకా హాట్ టాపిక్గా మారింది. మైనారిటీల రక్షణ కవచంగా చెప్పుకునే మజ్లిస్ పార్టీ, కేవలం హైదరాబాద్కే పరిమితం కాకుండా దేశవ్యాప్తంగా వివిధ రాష్ట్రాల్లో పావులు కదుపుతోంది. ఎక్కడ ముస్లిం ఓటు బ్యాంకు బలంగా ఉంటే అక్కడ తమ అభ్యర్థులను బరిలోకి దించుతూ ప్రధాన పార్టీల గెలుపోటములను శాసించే స్థాయికి ఎదిగింది. ఇంతటి జాతీయ స్థాయి ఇమేజ్ ఉన్న ఎంఐఎం.. తన సొంత గడ్డపై త్వరలో జరగబోయే మున్సిపల్ ఎన్నికల కోసం ఒక మాస్టర్ ప్లాన్ సిద్ధం చేసింది. ఎప్పుడూ పార్టీ ప్రధాన కార్యాలయం దారుస్సలాం వేదికగా, ఒవైసీ సోదరుల ఆశీస్సులతోనే, ఒక మూసి ఉన్న గదిలో కార్పొరేటర్ టికెట్లు ఖరారవుతుంటాయి. కానీ ఈసారి ఆ సాంప్రదాయాన్ని పక్కనపెట్టి.. “కార్పొరేటర్ టికెట్ కావాలనుకునే వారు దరఖాస్తు చేసుకోండి” అంటూ తమ సొంత ఉర్దూ దినపత్రికతో పాటు, పార్టీ అధికారిక సోషల్ మీడియా ప్లాట్ఫామ్స్లో ఓపెన్ గా నోటిఫికేషన్ ఇవ్వడం పొలిటికల్ సర్కిల్స్ను విస్మయానికి గురిచేస్తోంది.
ఆన్లైన్ ద్వారా అప్లికేషన్లు ఆహ్వానించడం వెనుక అధిష్టానం ఒక భారీ స్కెచ్ వేసిందన్న వాదన బలంగా వినిపిస్తోంది. హైదరాబాద్ పాతబస్తీలోని చాలా డివిజన్లలో ఒకే లీడర్ ఏళ్ల తరబడి, కొన్నిసార్లు దశాబ్దాల పాటు కార్పొరేటర్లుగా తిష్టవేసి కొనసాగుతున్నారు. దీనివల్ల స్థానికంగా అభివృద్ధి కుంటుపడి, ఆయా సిట్టింగ్ కార్పొరేటర్లపై ప్రజల్లో తీవ్ర వ్యతిరేకత వ్యక్తమవుతోంది. మౌలిక సదుపాయాల లేమితో పాతబస్తీ యువతలో కూడా తమ ప్రజాప్రతినిధులపై రోజురోజుకూ అసంతృప్తి పెరుగుతోంది. క్షేత్రస్థాయిలో ఉన్న ఈ యాంటీ ఇంకంబెన్సీని ఎంఐఎం అధిష్టానం పక్కాగా పసిగట్టింది. ఎప్పటిలాగే పాత వారికే మళ్లీ టికెట్లు ఇస్తే ఈసారి మున్సిపల్ ఎన్నికల్లో పార్టీకి డ్యామేజ్ తప్పదని ఒవైసీ బ్రదర్స్ గ్రహించారు. కింది స్థాయిలో ఉన్న ఈ ప్రజా వ్యతిరేకతను అధిగమించడానికి, బంధుప్రీతి ఆరోపణలను తిప్పికొట్టడానికే పార్టీ నాయకత్వం వ్యూహాత్మకంగా ఈ ఓపెన్ నోటిఫికేషన్ ఆప్షన్ను ఎంచుకుందని రాజకీయ విశ్లేషకులు భావిస్తున్నారు.
పార్టీలోకి కొత్త రక్తాన్ని ఎక్కించే క్రమంలోనే ఎంఐఎం ఈ సాహసోపేతమైన నిర్ణయం తీసుకుంది. సమాజంలో క్లీన్ ఇమేజ్ ఉండి, ప్రజల సమస్యలపై అవగాహన ఉన్న ఉన్నత విద్యావంతులైన యువతను బరిలోకి దించాలని పార్టీ భావిస్తోంది. ఇలాంటి ఫ్రెష్ క్యాండిడేట్స్ ను ఎన్నికల బరిలో నిలపడం ద్వారా పాతబస్తీలోని అన్ని స్థానాలను క్లీన్ స్వీప్ చేయాలన్నది పతంగి పార్టీ ప్రధాన వ్యూహంగా కనిపిస్తోంది. అయితే అధిష్టానం తీసుకున్న ఈ ఆకస్మిక నిర్ణయంతో ఏళ్ల తరబడి పార్టీ జెండా మోసిన కొందరు సీనియర్లు, సిట్టింగ్ కార్పొరేటర్ల ఆశలు గల్లంతు కావడం ఖాయంగా కనిపిస్తోంది. పాత కాపులకు చెక్ పెట్టి కొత్తవారికి ఆహ్వానం పలకడంపై పార్టీలో అంతర్గతంగా కొంత కలవరం మొదలైంది. అయితే నాయకుల ఆవేదన ఎలా ఉన్నా, టికెట్ల పంపిణీలో పూర్తి పారదర్శకత కోసమే తాము ఈ నిర్ణయం తీసుకున్నామని, అర్హులైన వారెవరైనా దరఖాస్తు చేసుకోవచ్చని అధినాయకత్వం పార్టీ శ్రేణులకు క్లియర్గా తేల్చి చెబుతోంది. పనితీరు బాగాలేని వారికి ఎట్టి పరిస్థితుల్లోనూ తిరిగి అవకాశం ఇచ్చే ప్రసక్తే లేదని స్పష్టం చేస్తోంది.
ఏది ఏమైనా ఒక ప్రధాన ప్రాంతీయ పార్టీ కార్పొరేటర్ అభ్యర్థుల కోసం పబ్లిక్ నోటిఫికేషన్ ఇవ్వడం అనేది ఇప్పుడు తెలంగాణ రాజకీయ వర్గాల్లో ఒక ట్రెండ్ సెట్టర్ గా మారింది. అయితే ఈ కొత్త స్ట్రాటజీ మజ్లిస్ పార్టీకి ఎన్నికల్లో మైలేజ్ ఇస్తుందా, లేక పాత నాయకుల రూపంలో రెబల్స్ పుట్టుకొచ్చేలా చేస్తుందా అన్నది ప్రస్తుతానికి ఒక మిలియన్ డాలర్ల ప్రశ్నగా మిగిలిపోయింది. టికెట్లు దక్కని సీనియర్లు లోపాయికారీగా కొత్త అభ్యర్థులను ఓడించేందుకు ప్రయత్నిస్తే పార్టీకి అది అతిపెద్ద నష్టంగా మారుతుంది. ఈ రెబల్ సిచ్యుయేషన్ను హ్యాండిల్ చేయడం, అసంతృప్తులను బుజ్జగించడం అసదుద్దీన్ ఒవైసీకి కత్తిమీద సాము లాంటిదే. యువతకు పెద్దపీట వేయాలన్న ఈ వ్యూహం వర్కౌట్ అయితే మాత్రం పాతబస్తీ పాలిటిక్స్ లో ఎంఐఎంకు తిరుగుండదు. ఫైనల్గా మున్సిపల్ ఎన్నికల నోటిఫికేషన్ వచ్చే నాటికి పాతబస్తీ పతంగి ఈ రాజకీయాల కొత్త గాలితో ఎటువైపు ఎగురుతుందో, ఎలాంటి ఫలితాలను రాబడుతుందో చూడాలి.
