వచ్చే ఎన్నికల్లో వైసీపీ తరఫున ఎన్నికల ప్రచారం నిర్వహించే టాలీవుడ్ స్టార్స్ ఎవరు..? టీడీపీ జనసేనకు ఉన్న సినీ గ్లామర్ వైసీపీకి ఉందా..? గత ఎన్నికల్లో వైసీపీ తరుపున ప్రచారం చేసిన సినీ ప్రముఖులు ఈ సారి వైసీపీకి మద్దతు పలుకుతారా..? అసలు వైసీపీలో సినీ ప్రముఖులు ఎవరెవరు ఉన్నారు..?
రాష్ట్ర రాజకీయాలకు సినీ నటులకు విడదీయరాని సంబంధం ఉంది. సినీ స్టార్లు ప్రచారంలో పాల్గొంటే ఎంతో కొంత ప్లస్‌ అవుతుందని అన్ని రాజకీయ పార్టీలు భావిస్తుంటాయి. అందుకే ప్రతి ఎన్నికల సమయానికి తమ పార్టీ తరఫున ప్రచారం చేసేందుకు టాలీవుడ్ సెలబ్రిటీలను రంగంలోకి దింపడం ఆనవాయితీగా వస్తోంది. ఏపీ రాజకీయాలకు వస్తే టీడీపీకి సినీ గ్లామర్ ఎక్కువగా ఉంది. ప్రస్తుతం టాలీవుడ్ అగ్ర హీరోల్లో ఒకరైన నందమూరి బాలక్రిష్ణ టీడీపీ ఎమ్మెల్యేగా ఉన్నారు. మరోవైపు యూత్‌లో ఓ రేంజ్‌లో ఫాలోయింగ్ ఉండి టాప్ పొజిషన్‌లో ఉన్న పవన్ కళ్యాణ్ జనసేన పార్టీ అధినేతగా ఉన్నారు. దీంతో కూటమి పార్టీలకు ఇటు పవన్, అటు బాలయ్య ఎలక్షన్ క్యాంపెయిన్ చేయనున్నారు.
అయితే.. టిడిపి, జనసేన కూటమితో పోలిస్తే సినీ గ్లామర్ విషయంలో వైసీపీ వెనకబడిందనే అభిప్రాయాలు వినిపిస్తున్నాయి. రాజకీయాల్లోకి రాకముందు హీరోయిన్‌గా రాణించిన రోజా ప్రస్తుతం వైసీపీలో ఫైర్ బ్రాండ్‌గా ఉన్నారు. ఆమె రెండు సార్లు ఎమ్మెల్యేగా ఎన్నిక అయ్యారు. ప్రస్తుతం జగన్ కేబినెట్ లో మంత్రిగా కూడా ఉన్నారు. అయితే రోజా మినహా ఆ పార్టీలో ప్రస్తుతం చెప్పుకోదగ్గ సినీ నటులు ఎవరు లేక పోవడం మైనస్ గా మారిందనే అభిప్రాయాలు వ్యక్తమవుతున్నాయి. గత ఎన్నికల్లో చాలా మంది నటులు వైసీపీ తరుపున ఎన్నికల ప్రచారం నిర్వహించారు. పోసాని కృష్ణ మురళి, అలీ, మోహన్ బాబు, జయసుధ, థర్టీ ఇయర్స్ ఇండస్ట్రీ పృథ్వీతో పాటు మరికొంత మంది చిన్న చితకా నటులు ప్రతిపక్షాలకు వ్యతిరేకంగా ప్రచారం నిర్వహించారు. వారి గ్లామర్ కూడా కొంత వరకు యాడ్ కావడంతో వైసీపీ తిరుగులేని మెజార్టీ సాధించి గత ఎన్నికల్లో అధికారంలోకి వచ్చింది. అయితే ఈ మధ్య కాలంలో వైసీపీకి మోహన్ బాబు, పృధ్వీ, జయసుధ, జీవితా రాజశేఖర్ దంపతులు దూరం అయ్యారు.
వచ్చే సార్వత్రిక ఎన్నికలకు మరో నెలన్నర మాత్రమే సమయం ఉంది. ఈసారి ఎన్నికల్లో టీడీపీ-జనసేన, బీజేపీ కలిసి పోటీ చేస్తున్నాయి. టీడీపీ-జనసేన కలిసి పోటీ చేస్తుండటంతో ఆ పార్టీ కి కావాల్సినంత సినిమా గ్లామర్ తోడైంది. బాలకృష్ణ, పవన్ కళ్యాణ్‌కు ఇండస్ట్రీలో ఉన్న ఫ్యాన్ ఫాలోయింగ్ గురించి ప్రత్యేకంగా చెప్పనవసరంలేదు. ఈ నేపథ్యంలో ఈ మల్టీ స్టార్స్ కి కౌంటర్ గా వైసీపీ కూడా క్రేజీ యాక్టర్స్ ని రంగంలోకి దింపాలని భావిస్తున్నట్లు చెబుతున్నారు. అయితే ఈ మధ్య కాలంలో వైసీపీకి ఇండస్ట్రీ నటుల నుంచి పెద్దగా సానుకూల స్పందన రావడం లేదని చర్చ జరుగుతోంది. ముఖ్యంగా సినిమా టికెట్ల విషయంలో ప్రభుత్వం తీసుకున్న నిర్ణయం పై సినీ పెద్దలు అసంతృప్తిగా ఉన్నారనే టాక్ వినిపిస్తోంది.
అయితే ఎన్నికలు దగ్గర పడుతున్న వేళ సినీ పరిశ్రమకు చెందిన వారిని మళ్లీ దగ్గరకు తీయాలని వైసీపీ భావిస్తోందట. గత ఎన్నికల ముందు యాత్ర పేరుతో వైస్సార్ పై తీసిన సినిమా కూడా వైసీపీ కి కలిసి వచ్చింది. దీంతో యాత్ర 2 పేరుతో జగన్ కి అనుకూలంగా మరో సినిమాను తెరపైకి తెచ్చారు. దర్శకుడు రామ్ గోపాల్ వర్మ వ్యూహం, శపథం పేరుతో రెండు సినిమాలు తీశారు. వచ్చే ఎన్నికల్లో వర్మ వైసీపీ తరుపున ఎన్నికల ప్రచారం నిర్వహించే అవకాశం ఉంది. మరోవైపు కమెడియన్ అలీ గత ఎన్నికల్లో వైసీపీ తరుపున ఎన్నికల ప్రచారం నిర్వహించారు. ఈసారి కూడా ఆయన వైసీపీకి ప్రచారం చేయనున్నారు. అయితే టీడీపీ, జనసేనతో పోలిస్తే..వైసీపీకి సినీ గ్లామర్ తక్కువనే అభిప్రాయాలున్నాయి. మరి ఈసారి ఎన్నికల్లో వైసీపీ తరపున ఎంతమంది సినీ తారలు ప్రచారం చేస్తారు..? ఆ పార్టీకి సినీ గ్లామర్ ఎంత వరకు కలిసి వస్తుందో వేచి చూడాలి.