న్యూయార్క్: ప్రసిద్ధ న్యూయార్క్ ఫ్యాషన్ వీక్‌లో సెప్టెంబరు 10న సాయంత్రం ఒక చారిత్రాత్మక ఘట్టం ఆవిష్కృతమైంది. ప్రతిష్టాత్మక వేడుక చరిత్రలో మొట్టమొదటిసారిగా మనోహరమైన భరతనాట్యం గ్రూప్ డ్యాన్స్ రన్‌వే వేదికపై ప్రేక్షకులను మంత్రముగ్దులను చేసింది. ప్రముఖ నాట్య‌క‌ళాకారిణి, సినీ న‌టి ఇంద్రాణి దవలూరి నేతృత్వంలో శ్రీనిధి, ఇషా, లాస్య, కుషీలతో కలిసి ప్రదర్శించబడింది. ఈ ప్ర‌ద‌ర్శ‌న ప్రేక్షకులపై చెరగని ముద్ర వేయడంతో పాటు అద్భుతమైన ప్రశంసలతో నిండింది.
డబుల్ మాస్టర్స్ డిగ్రీలు, మిసెస్ సౌత్ ఏషియా, వరల్డ్ ఎలైట్ అనే విశిష్టమైన బిరుదులు పొందిన ప్రముఖ నాట్య‌క‌ళాకారిణి, న‌టి ఇంద్రాణి దవలూరి ఈ అద్భుతమైన ప్రదర్శనపై తన ఆలోచనలను పంచుకున్నారు. రన్‌వే ప్రదర్శనలో వేదికపైకి వెళ్లే ముందు త‌న‌కు ఒత్తిడి ఉంద‌ని, అయితే ప్రేక్షకుల నుండి వచ్చిన అపరిమితమైన శక్తి , అపారమైన ప్రశంసలు త‌న‌లోని భయాలను తగ్గించాయ‌ని తెలిపారు. అంతేకాకుండా, త‌మ విద్యార్థులు ఈ చారిత్రాత్మక క్షణంలో భాగమైనందుకు పూర్తి ఆనందం వ్యక్తం చేశారు.
ఇంద్రాణి ఇటీవల యునైటెడ్ స్టేట్స్‌లోని ప్రముఖ జాతీయ నెట్‌వర్క్ అయిన W9USA ఛానెల్‌లో ఒక ప్రత్యేక ఇంటర్వ్యూలో కనిపించారు. సౌత్ ఆసియన్ హెరిటేజ్ మంత్ సందర్భంగా ఈ ఇంటర్వ్యూ జరిగింది. అక్కడ ఆమె తన కళాత్మకత, అనేక లాభాపేక్ష లేని ఈవెంట్‌లను నిర్వహించడంలో ఆమె చేసిన విస్తృతమైన కృషి ద్వారా సమాజంపై ఆమెకున్న అచంచలమైన నిబద్ధతకు గుర్తింపు పొందింది.
ఇంద్రాణి తన విజయాలతో పాటు, “అందెల రావమిది” అనే పేరుతో రాబోయే సినిమా నిర్మాణం, నటనలో చురుకుగా పాల్గొంటోంది. ఈ సినిమా యునైటెడ్ స్టేట్స్‌లోని ఒక నర్తకి కష్టతరమైన ప్రయాణం చుట్టూ తిరుగుతుంది. తన కలల సాధనలో ఒక కళాకారుణి ఎదుర్కొన్న సంఘ‌ర్ష‌ణ, విజయాలను ఆవిష్క‌రిస్తుంది. ఈ చిత్రం వచ్చే వేసవిలో ఓటీటీలో అలంకరించడానికి సిద్ధంగా ఉంది. మంచి కథ, కథనం, అసాధారణమైన ప్రదర్శనలతో ప్రేక్షకులను ఆకట్టుకుంటుందని ఇంద్రాణి ఆశాభావం వ్యక్తం చేశారు.