స్వతంత్ర వెబ్ డెస్క్: మామాఅల్లుళ్లు పవన్ కళ్యాణ్, సాయిధరమ్ తేజ్ కలిసి నటించిన ‘బ్రో’ సినిమా ఈరోజు ప్రేక్షకుల ముందుకు వచ్చిన సంగతి తెలిసిందే. అయితే, ఎప్పటిలాగే యూఎస్ఏలో ముందుగానే ప్రీమియర్లు పడిపోయాయి. అక్కడ సినిమా చూసినవాళ్లు ట్విట్టర్ ద్వారా తమ అభిప్రాయాలను వెల్లడిస్తున్నారు. అందరి దగ్గర నుంచీ వినిపిస్తోన్న ఒకే మాట ఇది కంప్లీట్ పవర్ స్టార్ ఫ్యాన్స్ స్టఫ్. ఆయన దగ్గర నుంచి అభిమానులు ఏం కోరుకుంటారో అదంతా సినిమాలో చూపించేశారట. ముఖ్యంగా ఫస్టాఫ్లో పవర్ స్వాగ్ అభిమానులకు ఫుల్ మీల్స్ అంటున్నారు.
కామెడీ, పవన్ కళ్యాణ్ మేనరిజంతో ఫస్టాఫ్ ఎంటర్టైనింగ్గా ఉందట. సాధారణ ప్రేక్షకులకు మరీ అంత గొప్పగా ఏమీ అనిపించదని అంటున్నారు. మొత్తంగా అయితే ఫస్టాఫ్ డీసెంట్గా ఉందట. ఎక్కువగా పవన్ కళ్యాణ్ మేనరిజం మీదే దృష్టిపెట్టారని అంటున్నారు. ఆయన పాత సినిమాల్లో గెటప్లు, పాటలను సందర్భానుసారంగా తీసుకురావడం అభిమానులను ఉర్రూతలూగిస్తుందని టాక్. ఫస్టాఫ్ డీసెంట్గా ఉండడంతో సెకండాఫ్ అదిరిపోవడం ఖాయం అనుకునేవారికి నిరాశ తప్పదని కొందరు అంటున్నారు. సెకండాఫ్ను చాలా ఫ్లాట్గా నడిపించారని.. స్క్రీన్ప్లే చాలా వీక్గా రాసుకున్నారని విమర్శిస్తున్నారు.
కొంత మంది అయితే ఇది ఫ్యాన్స్ కోసం మాత్రమే తీసిన సినిమా అని చెబుతున్నారు. సినిమా మొత్తాన్ని పవన్ కళ్యాణ్ ఫ్యాన్స్ మూమెంట్స్తో నింపేశారని విమర్శిస్తున్నారు. సినిమా కథ కానీ, ఎమోషన్స్ కానీ ప్రేక్షకుడికి కనెక్ట్ అవ్వవని అంటున్నారు. తమన్ మ్యూజిక్పై కూడా మిశ్రమ స్పందన వస్తోంది. కొంత మంది పాటలు, నేపథ్య సంగీతం బాగున్నాయి అంటే.. కొందరు మాత్రం పాటలు పెద్దగా లేవని, తమన్ బీజీఎం ఫర్వాలేదని అంటున్నారు. ఇంకొందరు అయితే తమన్ బీజీఎం అస్సలు బాగాలేదని ట్వీట్లు చేస్తున్నారు. సినిమా మొత్తాన్ని పవన్ కళ్యాణ్ తన భుజస్కంధాలపై మోసారట. సాయిధరమ్ తేజ్ నటన మెరుగుపడాలని.. ఎమోషనల్ సీన్స్లో తేలిపోయారని విమర్శిస్తున్నారు.
మొత్తంగా ఈ సినిమాలో ప్లస్ పాయింట్ల విషయానికి వస్తే.. చొక్కాలు చింపుకునే ఫ్యాన్స్ స్టఫ్, సందర్భానుసారంగా వచ్చే పవన్ కళ్యాణ్ వింటేజ్ సాంగ్స్, పర్ఫెక్ట్గా ఫిట్ అయ్యే పొలిటికల్ డైలాగులు. అంతేకాదు, పవన్ కళ్యాణ్ ఎంట్రన్స్ కూడా అదుర్స్ అట. కొంత మంది అయితే పీకే కెరీర్లోనే బెస్ట్ ఇంట్రడక్షన్ అంటున్నారు. ఇక మైనస్ పాయింట్ల విషయానికి వస్తే.. మంచి స్టోరీలైన్ను తెరపై అంతే గొప్పగా ఆవిష్కరించలేకపోయారట. ఫ్యాన్స్ స్టఫ్ మీద బాగా దృష్టి పెట్టి సినిమాను ఎమోషనల్గా కనెక్ట్ చేయడంలో విఫలమయ్యారట. వీఎఫ్ఎక్స్ ఎక్కువ ప్రాధాన్యత ఉన్న ఈ సినిమాలో ఆర్టిస్టులందరికీ క్లోజప్ షాట్స్ పెట్టడం ప్రేక్షకులను విసిగిస్తుందట. అంతేకాదు, వీఎఫ్ఎక్స్ కూడా చాలా నాసిరకంగా ఉన్నాయంటున్నారు. మొత్తంగా చూసుకుంటే ఇదొక యావరేజ్ మూవీ అనే టాక్ గట్టిగా వినిపిస్తోంది.
