విజయనగరం జిల్లా రాజకీయ చరిత్రను ఒకసారి నిశితంగా పరిశీలిస్తే అక్కడ వందల సంవత్సరాల పాటు రాచరిక ఆధిపత్యం స్పష్టంగా కనిపిస్తుంది. విజయనగరం రాజులు, బొబ్బిలి రాజులు, కురుపాం రాజులు, మొయిద రాజులు ఒకప్పుడు ఈ ప్రాంతాన్ని ఏక చక్రాధిపతులుగా పరిపాలించారు. ప్రజాస్వామ్యం వచ్చిన తర్వాత కూడా రాజకీయ అధికారం ఆయా సంస్థానాధీశుల చేతుల్లోనే ఉండిపోయింది. సరిగ్గా అలాంటి పరిస్థితుల్లో ఒక సామాన్య కుటుంబం నుంచి వచ్చిన బొత్స సత్యనారాయణ జిల్లా రాజకీయ ముఖచిత్రాన్ని పూర్తిగా మార్చివేశారు. 1991లో రాజకీయ అరంగేట్రం చేసిన ఆయన, బడుగు బలహీన వర్గాల రాజ్యాధికారం కోసం నిరంతరం శ్రమించారు. అప్పటివరకు తిరుగులేని శక్తిగా ఉన్న వివిధ సంస్థానాల రాజుల ప్రాబల్యాన్ని క్రమక్రమంగా తగ్గించుకుంటూ వచ్చి, సామాన్యులకు సైతం పాలిటిక్స్లో చోటు ఉంటుందని నిరూపించారు. రాజకీయంగా మెట్టు మెట్టు ఎదుగుతూ 2004 నాటికి రాష్ట్ర మంత్రి స్థాయికి చేరుకున్నారు. మంత్రి పదవి చేపట్టిన నాటి నుంచి ఆయన వెనుదిరిగి చూసుకోలేదు. రాచరిక ఆధిపత్యానికి చెక్ పెట్టి విజయనగరంలో తనకంటూ ఒక బలమైన సామ్రాజ్యాన్ని నిర్మించుకున్నారు.
రాజకీయాల్లో నాయకులు పదవులు రాగానే ప్రజలకు దూరమవుతారనే అపవాదు ఉంటుంది. కానీ బొత్స సత్యనారాయణ స్వభావం దానికి పూర్తి భిన్నంగా ఉంటుందని స్థానికులు బలంగా నమ్ముతారు. ఆయన అందరినీ కలుపుకుని వెళ్లే తత్వం, నికార్సయిన రాజకీయాలు చేయడం ఆయనకు ఎప్పుడూ కలిసి వచ్చే ప్రధాన అంశాలుగా నిలిచాయి. జిల్లాకు చెందిన వారు ఏ పార్టీలో ఉన్నా, వారికి ఎలాంటి సహాయ సహకారాలు కావాలన్నా బొత్స ఇంటి తలుపులు ఎప్పుడూ తెరిచే ఉంటాయన్నది ఆయన అనుచరులు చెప్పే మాట. ఆయన ఇంటికి వెళ్లగానే ఏ పని మీద వచ్చారు, మీకు ఏం కావాలి, ఆ పని చేయడానికి నేను ఎవరికి చెప్పాలి అనే సూటి ప్రశ్నలతో ఆ కుటుంబం సామాన్యులతో మమేకమై పనిచేస్తుందని స్థానికులు చెబుతుంటారు. పార్టీలతో సంబంధం లేకుండా వ్యక్తిగత సహాయం అందించే ఈ విలక్షణమైన స్వభావమే ఆయనకు క్షేత్రస్థాయిలో బలమైన పునాదులు వేసింది. ఇన్నేళ్ల రాజకీయ జీవితంలో ఆయన సంపాదించుకున్న ఈ గుడ్ విల్ కారణంగానే, ప్రస్తుత విపత్కర పరిస్థితుల్లో ఆయన పట్ల ప్రజల్లో సానుభూతి విపరీతంగా పెరుగుతోంది.
ఒకప్పుడు విజయనగరం జిల్లాలో ‘బొత్స కుటుంబం’ అంటే ఒక బలమైన, విడదీయరాని రాజకీయ శక్తిగా ఉండేది. కానీ ప్రస్తుతం శాసనమండలి ప్రతిపక్ష నేతగా ఉన్న బొత్స సత్యనారాయణ కుటుంబంలో చోటుచేసుకున్న తాజా పరిణామాలు రాష్ట్ర రాజకీయాల్లో తీవ్ర సంచలనం సృష్టిస్తున్నాయి. ఆయనకు అత్యంత సన్నిహితుడు, నమ్మకస్తుడైన మేనల్లుడు, వైసీపీ విజయనగరం జిల్లా అధ్యక్షుడు మజ్జి శ్రీనివాసరావు అధికార పార్టీ గూటికి చేరారు. వైసీపీకి రాజీనామా చేసి, ముఖ్యమంత్రి చంద్రబాబు నాయుడు సమక్షంలో ఆయన తెలుగుదేశం కండువా కప్పుకోవడం రాజకీయ వర్గాలను విస్మయానికి గురిచేసింది. ఈ అనూహ్య పరిణామం నేపథ్యంలో బొత్స సత్యనారాయణపై ప్రజల్లో సానుభూతి పెరుగుతుందన్న విశ్లేషణలు బలంగా వినిపిస్తున్నాయి. తన కనుసన్నల్లో రాజకీయంగా ఎదిగిన సొంత కుటుంబ సభ్యుడే ఇలాంటి కఠిన నిర్ణయం తీసుకోవడంతో బొత్స ఇప్పుడు రాజకీయంగా ఒంటరయ్యారనే భావన జిల్లా ప్రజల్లో నెలకొంది. కుటుంబంలోనే చీలిక రావడం, అత్యంత కీలకమైన మేనల్లుడే పార్టీ మారడం వల్ల జిల్లాలో బొత్స పట్టు సడలిందనే వాదన కూడా రాజకీయ వర్గాల్లో జోరుగా నడుస్తోంది.
సొంత మేనల్లుడు పార్టీ వీడినప్పటికీ, ఈ తీవ్రమైన పరిణామాలపై బొత్స సత్యనారాయణ అత్యంత చాకచక్యంగా, రాజకీయ పరిణితితో స్పందించారు. రాజకీయాల్లో మనుషులకు ఎవరి స్వార్థం వారికి ఉంటుందని, వ్యక్తులు వస్తుంటారు పోతుంటారు కానీ సిద్ధాంతాలు ఉన్న పార్టీలు మాత్రమే ఎప్పటికీ శాశ్వతంగా నిలుస్తాయంటూ ఆయన కుండబద్దలు కొట్టారు. చిన్న శ్రీను పార్టీ మార్పును తాను పెద్దగా పట్టించుకోవడం లేదన్న సంకేతాలను ఆయన తన క్యాడర్కు పంపించారు. అయితే దీని వెనుక మరో ఆసక్తికరమైన రాజకీయ వాదన కూడా వినపడుతోంది. ఏ పార్టీ అధికారంలో ఉన్నా జిల్లాలో బొత్స కుటుంబమే పరోక్షంగా పెత్తనం చేస్తుందని, అధికార పక్షంలో ఒకరు, ప్రతిపక్షంలో ఒకరు ఉండటం కూడా వారి రాజకీయ వ్యూహంలో భాగమేనని కొందరు ప్రత్యర్థులు ఆరోపిస్తున్నారు. కానీ బహిరంగంగా చూస్తే, సొంత మేనల్లుడే పార్టీ వీడి వెళ్లడం ఒక సీనియర్ నాయకుడిగా బొత్సకు వ్యక్తిగతంగా, మానసికంగా కొంత ఇబ్బందికరమైన విషయమేనని ఆయన సన్నిహితులు విశ్లేషిస్తున్నారు.
మేనల్లుడి రాజీనామా వల్ల వస్తున్న ఈ సానుభూతి బొత్సకు రాజకీయంగా ఏ మేరకు కలిసి వస్తుందనేది రాబోయే రోజుల్లో తేలనుంది. రాష్ట్రంలో స్థానిక సంస్థల ఎన్నికలు సమీపిస్తున్న తరుణంలో ఈ పరిణామాలు అత్యంత కీలకంగా మారబోతున్నాయి. విపత్కర పరిస్థితుల్లో విజయనగరం జిల్లాలో వైసీపీ క్యాడర్ను చెదిరిపోకుండా ఆయన ఎలా కాపాడుకుంటారు, నాయకుల్లో ధైర్యం ఎలా నింపుతారు అన్నదే ఇప్పుడు ఆయన ముందున్న అతిపెద్ద సవాలుగా మారింది. అదే సమయంలో తన కుమార్తెను క్రియాశీల రాజకీయాల్లోకి తీసుకువచ్చి, ఆమె భవిష్యత్తును ఎలా ముందుకు నడిపిస్తారనే అంశంపై జిల్లా రాజకీయాల్లో సర్వత్రా ఆసక్తి నెలకొంది. మూడు దశాబ్దాల సుదీర్ఘ రాజకీయ ప్రస్థానంలో ఎన్నో ఎత్తుపల్లాలు చూసిన బొత్స సత్యనారాయణ, మేనల్లుడి నిష్క్రమణతో ఏర్పడిన ఈ కొత్త సంక్షోభాన్ని సానుభూతి అస్త్రంతో ఎదుర్కొని తన ఉనికిని చాటుకుంటారని ఆయన అభిమానులు బలంగా విశ్వసిస్తున్నారు. మరి ఏం జరుగుతుందో వేచి చూడాలి.
