మాజీ సర్పంచ్‌లను నిర్బంధించడం అప్రజాస్వామికం – హరీష్‌రావు

మాజీ సర్పంచ్‌ల అరెస్ట్‌లపై ట్విట్టర్‌ వేదికగా స్పందించారు మాజీ మంత్రి హరీష్‌రావు. ప్రజా పాలన అంటే ఊరికి సేవ చేసిన సర్పంచ్‌లను అరెస్టులు చేయడమా అని మండిపడ్డారు. పెండింగ్ బిల్లులు విడుదల చేయాలని పోరుబాటకు పిలుపునిచ్చిన మాజీ సర్పంచ్‌లను ఎక్కడికక్కడ అరెస్ట్ చేయడాన్ని తీవ్రంగా ఖండిస్తున్నానన్నారు. అక్రమంగా నిర్బంధించడం అప్రజాస్వామికమని ఫైర్‌ అయ్యారు. అప్పులు తెచ్చి, ఆస్తులు అమ్మి, భార్యా పిల్లల మీద ఉన్న బంగారం కుదువ పెట్టి.. గ్రామాభివృద్ధి కోసం కృషి చేసిన డబ్బులు ఇవ్వాలంటే ప్రభుత్వం అరెస్టులు చేస్తుందని విమర్శలు గుప్పించారు. బడా కాంట్రాక్టర్లకు బిల్లులు చెల్లిస్తూ, చిన్న పనులు చేసిన మాజీ సర్పంచులకు మాత్రం బిల్లులు చెల్లించకపోవడంలో ఆంతర్యం ఏంటని నిలదీశారు. అక్రమంగా నిర్బంధించిన, అరెస్టులు చేసిన మాజీ సర్పంచులను వెంటనే విడుదల చేయాలని, పెండింగ్ బిల్లులను తక్షణం చెల్లించాలని డిమాండ్‌ చేశారు.