స్వతంత్ర వెబ్ డెస్క్: ప్రస్తుతం సోషల్ మీడియా ప్రపంచంలో నడుస్తున్న ట్రెండ్ రీల్స్. కూర్చున్నా.. నిలబడినా.. తుమ్మినా.. దగ్గినా.. ఏం చేసినా వీడియో తీసి.. దానికి కాస్త బ్యాక్ గ్రౌండ్ మ్యూజిక్ జోడించి సోషల్ మీడియాలో పోస్ట్ పెట్టాల్సిందే. నేటి యువత దానికి ఎంతలా ఎడిక్ట్ అయ్యారో మాటలో చెప్పలేం. ఇక వీళ్ళు పోస్ట్ చేసిన రీల్స్కి లైక్స్, షేర్స్, కామెంట్స్ వస్తే ఆ ఆనందానికి అవధులే ఉండవు. దీనికి కారణం లేకపోలేదు.. అలా రీల్స్ పెట్టి లక్షల్లో వ్యూస్
సంపాదించి సెలబ్రిటీలుగా చాలా మందే మారిపోయారు. అలా సెలబ్రిటీలా మారిన ఇన్ఫ్లూయెన్సర్లా హవానే నడుస్తుంది. అలాంటి వారు ఏం చేసినా చాలా మంది ఫాలో అవుతారు. అయితే.. ఇలాంటి రీళ్లు తయారు చేసేవాళ్లు చాలా మంది ఉన్నారు. వాటిని చూసే వారి గురించి ప్రత్యేకంగా చెప్పాల్సిన పనిలేదు. అయితే.. తెలంగాణ సర్కార్ ఈ రీళ్లు తయారు చేసే వారికి తీపి కబురు వినిపించింది.
జూన్ 26న అంతర్జాతీయ డ్రగ్ అండ్ ట్రాఫికింగ్ వ్యతిరేక దినోత్సవం సందర్భంగా తెలంగాణ ప్రభుత్వం ఒక కాంటెస్ట్ను నిర్వహిస్తుంది. అదే షార్ట్ వీడియో కాంటెస్ట్. రాష్ట్రంలో డ్రగ్స్ వాడకం తగ్గించాలనే ఉద్దేశ్యంతో.. యువత డ్రగ్స్కు బానిసలుగా మారి వారి జీవితాలను ఎలా నాశనం చేసుకుంటున్నారో ప్రజలకు అవగాహన కల్పించేందుకు ప్రభుత్వం సరికొత్త మార్గాన్ని ఎంచుకుంది. అయితే.. రీళ్ల ట్రెండ్ నడుస్తుండగా.. ఈ సందేశాన్ని ప్రజల్లోకి సులువుగా తీసుకెళ్లాలనే ఉద్దేశంతో.. ‘‘డ్రగ్స్ అండ్ ఇట్స్ ఎడ్వర్స్ ఇంపాక్ట్ ఆన్ సొసైటీ’’ పేరుతో పోలీస్ శాఖ కాంటెస్ట్ నిర్వహించనుంది.
18 ఏళ్లు నిండిన వారందరూ ఈ పోటీలకు అర్హులని ప్రభుత్వం తెలిపింది. డ్రగ్స్ వాడకం వల్ల కలిగే దుష్పరిణామాలు, డ్రగ్స్ కు బానిసలైన వారి కుటుంబ సభ్యుల బాధలను ఈ రీళ్లలో చూపించడమే ఈ పోటీ ఉద్దేశం. అయితే.. ఈ వీడియోను 3 నిమిషాల నిడివితో రూపొందించాల్సి ఉంది. ఈ వీడియోలను జూన్ 20లోపు పంపాల్సి ఉంటుంది. ఈ పోటీలో విజేతలకు బహుమతులు అందజేయబడతాయి. మొదటి స్థానంలో నిలిచిన విజేతకు రూ. 75,000 , రెండో స్థానంలో గెలిచిన వారికి రూ. 50,000, మూడో స్థానంలో నిలిచిన వారికి రూ. 30,000 ప్రైజ్గా ఇవ్వబడుతుంది. ఈ పోటీలో పాల్గొనేందుకు ఆసక్తి ఉన్నవారు మరింత సమాచారం కోసం నిర్వాహకులను 96523 94751 నంబర్లో సంప్రదించవచ్చని పేర్కొంది.