హనుమకొండ జిల్లా భీమదేవరపల్లి మండలంలో రవాణా, బీసీ సంక్షేమ శాఖ మంత్రి పొన్నం ప్రభాకర్ పర్యటించారు. రాష్ట్ర ప్రభుత్వం ప్రతిష్టాత్మకంగా చేపట్టిన ఇంటింటి కుటుంబ సర్వేపై ఎన్యుమరెటర్స్ వేస్తున్న స్టిక్కరింగ్ ను గట్ల నర్సింగపూర్‌లో మంత్రి పరిశీలించారు. కుల గణనపై అధికారులకు సమగ్ర వివరాలు ఇవ్వాలని, సమాచారం గోప్యత ఉంటుందని స్థానికులకు తెలిపారు. అనంతరం స్కూల్ కి వెళ్తున్న విద్యార్థులతో పొన్నం ప్రభాకర్ ముచ్చటించారు.
విద్యార్థులు బాగా చదువుకోవాలని సూచించారు. స్థానిక కూరగాయలు అమ్మే మహిళలతో కూడా ఆయన మాట్లాడారు. వ్యాపారం ఎలా సాగుతోందని ఆరా తీశారు. అనంతరం గ్రామంలో పలు వీధుల్లో తిరుగుతూ ప్రజల సమస్యలను అడిగి తెలుసుకున్నారు. అంతకుముందు ఇటీవల మరణించిన భీమదేవరపల్లి మండల పార్టీ మాజీ అధ్యక్షులు సామల లింగమూర్తి చిత్రపటానికి మంత్రి పొన్నం నివాళులు అర్పించారు. లింగమూర్తి కుటుంబ సభ్యులను పరామర్శించి వారి కుటుంబానికి అండగా ఉంటామని హామీ ఇచ్చారు.