ఎట్టకేలకు మెడికో ప్రీతి హాస్టల్ గది తెరిచిన పోలీసులు

స్వతంత్ర, వెబ్ డెస్క్: సీనియర్‌ విద్యార్థి వేధింపులు తాళలేక ఆత్మహత్య చేసుకున్న మెడికో ప్రీతి హాస్టల్‌ గదిని పోలీసులు ఎట్టకేలకు తెరిచారు. కాకతీయ మెడికల్ కాలేజీ హాస్టల్‌‌లోని రూమ్ నెంబర్ 409లో ప్రీతి ఉండేది. ఆమె ఆత్మహత్య తర్వాత ఈ గది నాలుగు నెలలుగా మూసి ఉంది. ఇన్ని రోజుల తర్వాత కుటుంబసభ్యులు, అధికారుల సమక్షంలో పోలీసులు రూమ్ ఓపెన్‌ చేశారు. గదిని తెరిచాక ప్రీతి వస్తువుల్ని చూసి ఆమె తల్లిదండ్రులు బోరున విలపించారు. అనంతరం ప్రీతి లగేజీ ప్యాక్‌ చేసి కుటుంబసభ్యులకు అప్పగించారు. ఆ గదిలో ఇంజెక్షన్లు, సూదులు, మెడికల్‌ కిట్స్‌ లభ్యమయ్యాయి. మరోవైపు ప్రీతి ఆత్మహత్య కేసులో వరంగల్‌ పోలీసులు ఛార్జిషీట్‌ దాఖలు చేశారు. కాగా సీనియర్ స్టూడెంట్ సైఫ్ చేసే ర్యాగింగ్ భరించలేక ఆమె సూసైడ్‌కు పాల్పడిన సంగతి తెలిసిందే. కొన్ని నెలల క్రితం జరిగిన ఈ వ్యవహారం తెలంగాణలో తీవ్ర చర్చనీయాంశమైంది.