కాళేశ్వరం నీటి పాలేనా ?

వేసవి కాలం చివరికి వచ్చేసింది. ఇక, రాబోయేది వర్షాకాలం. ఈ నేపథ్యంలోనే కాళేశ్వరం ప్రాజెక్టు అధికారులకు కొన్ని కీలక సూచనలు చేశారు జస్టిస్ పీసీ ఘోష్. జూన్ పది లోగా ప్రాజెక్టులో భాగమైన అన్నారం, సుందిళ్ల బ్యారేజీలకు మరమ్మతులు చేసి పూర్తి వాటిని పునరుద్దరించాలని ఆదేశించారు. దీంతో అతి త్వరలోనే రంగంలోకి దిగనున్నారు అధికారులు. పనులు చేయించనున్నారు. మరి.. ఆ లోగా పనులు పూర్తయ్యేనా ? రుతుపవనాలు ముంచుకొస్తున్న నేపథ్యంలో అందరి చూపూ ఇప్పుడు కాళేశ్వరం మరమ్మతులపైనే నిలిచింది.

కాళేశ్వరం ప్రాజెక్టు పునరుద్దరణ పనులు శరవేగంగా జరుగుతాయా? అనుకున్న సమయంలోగా పూర్తవుతాయా? నైరుతి రుతుపవనాలు అతి త్వరలోనే రానున్నాయి అన్న వాతావరణ శాఖ సూచనల వేళ ఇప్పుడు అందరిలోనూ ఉత్కంఠ నెలకొంది. యావత్ దేశంలోనే ప్రతిష్టాత్మకంగా భావించి కాళేశ్వరం పేరుతో భారీ ప్రాజెక్టు నిర్మాణం చేపట్టింది గత బీఆర్ఎస్ ప్రభుత్వం. అత్యంత వేగంగా నిర్మాణ పనులు పూర్తయ్యేలా చూసింది. దీనికి సాటిరాగల ప్రాజెక్టు మరోటి లేదని చెప్పుకొచ్చారు నాటి పాలకులు. ఇదంతా ఒకెత్తు. కొన్ని నెలలపాటు అంతా బాగానే ఉంది. కానీ, ఆ తర్వాతే సీన్ రివర్సైంది. నిజమే.. ప్రాజెక్టు నిర్మాణంలో అవకతవకల కారణంగా బ్యారేజీ నిర్మాణం పూర్తైన కొద్ది రోజులకే మేడిగడ్డ వద్ద పిల్లర్లు కుంగిపోయాయి. గతేడాది అక్టోబర్ 21న మేడిగడ్డ బ్యారేజీలోని కొన్ని పిల్లర్లు ఐదు అడుగుల మేర కుంగిపో వడం అప్పట్లో సంచలనంగా మారింది. ఆ తర్వాత కాళేశ్వరంలో భాగమైన సుందిళ్లలోనూ బుంగ పడింది. దీంతో కొద్ది రోజులుగా కాళేశ్వరం ప్రాజెక్టులో నీరు నిల్వ చేసేందుకు వీలులేని పరిస్థితులు నెలకొన్నాయి. దీంతో ఇటు సాగునీరుకు అటు తాగునీటికి ప్రజలు తీవ్ర ఇబ్బందులు పడే పరిస్థితులు నెలకొన్నాయి.

ఈ నేపథ్యంలో కొద్ది రోజుల క్రితమే తెలంగాణలో ప్రభుత్వం మారటం రేవంత్ నేతృత్వంలోని కాంగ్రెస్ సర్కారు విచారణకు ఆదేశించడం చకచకా జరిగిపోయాయి. కాళేశ్వరంలో భాగంగా నిర్మించిన ప్రాజెక్టు లు, బ్యారేజీలు దెబ్బతిన్నాయని, అక్రమాలు జరిగాయన్న ఆరోపణలపై న్యాయ విచారణ జరుపుతు న్నారు జస్టిస్ పీసీ ఘోష్. ఇందులో భాగంగా ఆయన ఇటీవలె రాష్ట్రంలో పర్యటించారు. అనంతరం నేషనల్ డ్యామ్ సేఫ్టీ అథారిటీ – ఎన్‌డీఎస్‌ఏకు లేఖ రాశారు జస్టిస్ పీసీ ఘోష్. జస్టిస్ పీసీ ఘోష్ లేఖకు స్పందిస్తూ బ్యారేజీల పునరుద్దరణకు సంబంధించి తీసుకునే చర్యలపై నేషనల్ డ్యామ్ సేఫ్టీ అథారిటీ ఓ మధ్యంతర నివేదిక ఇచ్చింది. దీంతో.. ఆ రిపోర్ట్‌ను పరిశీలించిన జస్టిస్ పీసీ ఘోష్ అన్నారం, సుందిళ్ల బ్యారేజీలకు మరమ్మతులు, పునరుద్దరణ పనులు జూన్ పది కల్లా పూర్తి చేయాలని అధికారులను ఆదేశించారు. మేడిగడ్డ బ్యారేజీ మరింత దెబ్బతినకుండా నష్టనివారణ చర్యలు తీసుకోవాలని సూచించారు.

జస్టిస్ పీసీ ఘోష్ సూచనలతోపాటు ఎన్‌డీఎస్‌ఏ మధ్ంతర నివేదికతో మేడిగడ్డ బ్యారేజీలో దెబ్బతిన్న గేట్లను ఎత్తడం లేదంటే పది రోజుల్లో పూర్తిగా తొలగించాలని ప్రాజెక్టు నిర్మాణ సంస్థ ఎల్‌ అండ్ టీని నీటిపారుదల శాఖ అధికారులు ఇప్పటికే ఆదేశించారు. సాధారణంగా ప్రతియేటా జూన్ నెలలో మేడిగడ్డకు వరదలు వస్తుంటాయి. అప్పటి నుంచి ప్రారంభమై ఫిబ్రవరి వరకు కొనసాగుతాయి. దీంతో.. ఈసారి వరదలు తగ్గుముఖం పట్టాక బ్యారేజీపైన షీట్ ఫైల్స్ తో కాపర్ డ్యామ్ నిర్మించనున్నారు. మరోవైపు అన్నారం, సుందిళ్ల బ్యారేజీల్లో పునాది కింద రంధ్రాలు ఉన్నట్లు గుర్తించారు. పునాది కింద ఇసుక కొట్టుకుపోవడంతోనే రంధ్రాలు ఏర్పడినట్లు నిపుణులు తేల్చారు. వీటిని వర్షాకాలం ప్రారంభమ య్యే లోపు సరిచేయనున్నారు. అయితే ఈసారి నైరుతి రుతుపవనాలు కాస్త ముందుగానే రావచ్చంటూ అంచనాలు వేసింది వాతారవణ శాఖ. ఇప్పటికే నైరుతి రుతుపవనాల్లో కదలిక వచ్చిందంటూ చెప్పుకొచ్చింది. అదే జరిగితే వర్షాలు మే నెలాఖరు నాటికే ప్రారంభమయ్యే అవకాశాలు న్నాయి. దీంతో జస్టిస్ పీసీ ఘోష్ ఆదేశాల మేరకు పనులను గడువులోగా పూర్తి చేసేందుకు సిద్ధమవు తున్నారు అధికారులు. మరోవైపు మేడిగడ్డ బ్యారేజీకి ఇప్పటికే పలు సాంకేతిక పరీక్షలు నిర్వహించారు. ఇంకా కొన్ని చేయాల్సి ఉంది. అయితే ఆ పరీక్షల అనంతరమే 7వ బ్లాకును తొలగించాలా.. ఆ బ్లాక్ కుంగిపోవడంతో దాని ప్రభావం ఆరు, ఎనిమిది బ్లాకులపై పడిందా అన్నది తేలనుంది. ఒక వేళ ప్రభావం పడిందని తేలితే మొత్తం ఆ మూడు బ్లాకులు తొలగించి కొత్త బ్లాకులు నిర్మించాలా లేదంటే ఏం చేయాలన్న దానిపై నిర్ణయం తీసుకోనున్నారు .