జనసేన పార్టీ అధినేత పవన్ కళ్యాణ్ తన పొలిటికల్ గేర్ మార్చారు. వచ్చే సార్వత్రిక ఎన్నికలకు ఇంకా మూడేళ్ల సమయం ఉండగానే, ఇప్పటి నుంచే క్షేత్రస్థాయిలో పార్టీని బలోపేతం చేసే దిశగా పకడ్బందీ వ్యూహరచన చేస్తున్నారు. ప్రతిష్టాత్మకంగా చేపట్టిన ‘జనసేన ఉద్యమి’ సభ్యత్వ నమోదు విజయవంతం కావడంతో పార్టీ శ్రేణుల్లో నూతనోత్సాహం కనిపిస్తోంది. ఈ ఉత్సాహాన్ని కొనసాగిస్తూనే.. ఈ సాయంత్రం పార్టీ ముఖ్య నేతలు, సాధక్లతో ఆయన కీలక ఆత్మీయ సమావేశం నిర్వహించనున్నారు. ఇంతకీ రాబోయే స్థానిక సంస్థల ఎన్నికల కోసం పవన్ కళ్యాణ్ ఇవ్వబోయే ఆ కీలక దిశానిర్దేశం ఏమిటి? భవిష్యత్తులో ప్రభుత్వాన్ని శాసించే కింగ్ మేకర్గా ఎదిగేందుకు జనసేనాని వేస్తున్న ఈ కొత్త పొలిటికల్ స్కెచ్ ఎంతవరకు వర్కౌట్ అవుతుంది?
రాజకీయాల్లో ఎప్పుడూ ఒక అడుగు ముందే ఉండాలని జనసేన పార్టీ అధినేత పవన్ కళ్యాణ్ భావిస్తున్నారు. అందులో భాగంగానే వచ్చే సార్వత్రిక ఎన్నికల కోసం ఇప్పటి నుంచే పక్కా ప్రణాళికలు రచిస్తున్నారు. భవిష్యత్తులో రాష్ట్ర రాజకీయాలను శాసించే కింగ్ మేకర్గా, అవసరమైతే కింగ్ గా ఎదిగేందుకు ఆయన వేగంగా పావులు కదుపుతున్నారు. రానున్న రోజుల్లో ఏర్పడే ప్రభుత్వంలో జనసేన పార్టీ అత్యంత కీలకంగా మారితే, కీలకమైన మంత్రి పదవులతో పాటు తాము కోరిన సంఖ్యలో నామినేటెడ్ పోస్టులు, వివిధ కార్పొరేషన్ చైర్మన్ పదవులు అడిగేందుకు వీలవుతుందని ఆయన బలంగా అంచనా వేస్తున్నారు. కేవలం మిత్రపక్షంగా మాత్రమే మిగిలిపోకుండా, సొంత బలాన్ని అమాంతం పెంచుకోవడం ద్వారానే పాలిటిక్స్లో సరైన గుర్తింపు దక్కుతుందని ఆయన నమ్ముతున్నారు. అందుకే ఎన్నికలకు ఇంకా మూడేళ్ల సుదీర్ఘ సమయం ఉన్నప్పటికీ ఏమాత్రం అలసత్వం వహించకుండా, ఇప్పటి నుంచే పార్టీని సంస్థాగతంగా గ్రామ స్థాయి నుంచి బలోపేతం చేయడంపై ఆయన పూర్తి స్థాయిలో ఫోకస్ పెట్టారు.
క్షేత్రస్థాయిలో పార్టీని బలోపేతం చేసేందుకు పవన్ కళ్యాణ్ పక్కా యాక్షన్ ప్లాన్ అమలు చేస్తున్నారు. జనసేన ఆవిర్భావం నుంచి ఇప్పటి వరకూ ఎన్నడూ లేని విధంగా సంస్థాగత నిర్మాణంలో అత్యంత కీలక మార్పులు తీసుకొచ్చారు. జిల్లా స్థాయిలో పార్టీ వ్యవహారాలను ఎప్పటికప్పుడు పర్యవేక్షించేందుకు ప్రత్యేకంగా సమన్వయ కర్తలను నియమించారు. వారి ఆధ్వర్యంలో ప్రతి నియోజకవర్గ స్థాయిలో పార్టీ నేతలు, కింది స్థాయి కార్యకర్తలతో విస్త్రృతంగా సమావేశాలు నిర్వహించాలని అధిష్టానం కఠిన ఆదేశాలు జారీ చేసింది. అధినేత ఆదేశాలతో రాష్ట్రవ్యాప్తంగా నియోజకవర్గాల్లో ఈ ఆత్మీయ సమావేశాలు జోరుగా కొనసాగుతున్నాయి. అయితే ఈ క్రమంలో కొన్ని చోట్ల స్థానిక నేతల మధ్య ఉన్న పాత విభేదాలు, ఆధిపత్య పోరు బయటపడుతున్నాయి. సమావేశాల్లో వ్యతిరేక నినాదాలు వినిపిస్తున్నప్పటికీ, అధిష్టానం వాటన్నింటినీ ఒక కొలిక్కి తెచ్చే ప్రయత్నం నిరంతరం చేస్తోంది. స్థానికంగా చిన్న చిన్న లోపాలు ఉన్నా సరే, పార్టీని బలోపేతం చేయాలన్న పవన్ కళ్యాణ్ దృఢ సంకల్పం మాత్రం కొన్ని వర్గాల నాయకుల్లో ఆనందాన్ని నింపుతోంది.
జనసేన పార్టీ ప్రతిష్టాత్మకంగా చేపట్టిన ‘జనసేన ఉద్యమి’ సభ్యత్వ నమోదు కార్యక్రమం అనుకున్న లక్ష్యాన్ని చేరుకుని అత్యంత విజయవంతంగా ముగిసింది. రాష్ట్రవ్యాప్తంగా ప్రజలు, యువత స్వచ్ఛందంగా ముందుకు వచ్చి పార్టీలో చేరడంతో, ఏకంగా దాదాపు ఇరవై లక్షల మంది క్రియాశీలక సభ్యులుగా నమోదయ్యారు. ఇంత భారీ స్పందన రావడం పార్టీ నాయకత్వంలో సరికొత్త ఉత్సాహాన్ని నింపింది. ఈ సభ్యత్వ నమోదు ప్రక్రియలో కీలకంగా వ్యవహరించిన వలంటీర్లను, పార్టీ పట్ల ఎనలేని అంకితభావంతో పనిచేసిన కార్యకర్తలను ‘సాధక్’ లుగా పార్టీ అధికారికంగా గుర్తించింది. పార్టీ అధ్యక్షుడు పవన్ కళ్యాణ్ రాజకీయ సిద్ధాంతాలను, అలాగే కూటమి ప్రభుత్వంలో డిప్యూటీ సీఎంగా ఆయన చేపడుతున్న అభివృద్ధి కార్యక్రమాలను ఈ సాధక్లు ప్రజల ముంగిటకు విజయవంతంగా తీసుకువెళ్లగలిగారు. నియోజకవర్గాల వారీగా ఇన్ ఛార్జులను నియమించడమే కాకుండా, ఇలా పార్టీ కోసం అహర్నిశలు కష్టపడే ముఖ్యమైన కార్యకర్తలను గుర్తించి భవిష్యత్తులో వారికి పార్టీలో కీలక పదవులు అప్పగించాలని పవన్ కళ్యాణ్ నిర్ణయించారు.
సభ్యత్వ నమోదును విజయవంతం చేసిన ఈ సాధక్ లతో పవన్ కళ్యాణ్ ఒక అత్యంత కీలకమైన ఆత్మీయ సమావేశం నిర్వహించారు. కేవలం కింది స్థాయి కార్యకర్తలే కాకుండా, ఈ మెగా మీటింగ్ కు పార్టీ ముఖ్య నాయకులంతా విధిగా హాజరయ్యారు. రాష్ట్ర మంత్రులు, ఉద్యమి సభ్యత్వ నమోదు కార్యక్రమానికి పార్లమెంట్ ఇంచార్జులుగా వ్యవహరించిన సీనియర్ నేతలు, పార్టీ ఎంపీలు, ఎమ్మెల్యేలు, ఎమ్మెల్సీలతో పాటు వివిధ కార్పొరేషన్ ఛైర్మన్లు అందరూ ఈ సమావేశంలో పాల్గొన్నారు. కష్టపడిన సాధక్ లను అధినేత స్వయంగా అభినందించడంతో పాటు, పార్టీ విధానాలను క్షేత్రస్థాయికి ఎలా తీసుకువెళ్లాలన్న దానిపై పవన్ వారితో ముఖాముఖి చర్చించారు. ఎక్కడైతే పార్టీ సంస్థాగతంగా కొంత బలహీనంగా ఉందో, అక్కడ తీసుకోవాల్సిన దిద్దుబాటు చర్యల గురించి నేతల నుంచి డైరెక్ట్ గా ఫీడ్ బ్యాక్ తీసుకున్నారు. ప్రభుత్వంలో భాగస్వామిగా ఉంటూనే, సొంత పార్టీ ఉనికిని కాపాడుకుంటూ ప్రజల్లో మమేకం కావాల్సిన ఆవశ్యకతను ఈ భేటీ ద్వారా నాయకులకు పవన్ స్పష్టం చేశారు.
త్వరలో జరగనున్న పంచాయతీ, మున్సిపల్ తదితర స్థానిక సంస్థల ఎన్నికల్లో జనసేన పార్టీ అనుసరించాల్సిన రాజకీయ వ్యూహంపై పవన్ కళ్యాణ్ నాయకులకు ఒక స్పష్టమైన దిశానిర్దేశం చేశారు. కూటమి ధర్మాన్ని పాటిస్తూనే, స్థానిక పోరులో అత్యధిక స్థానాల్లో పోటీ చేసి గెలవడం ద్వారా క్షేత్రస్థాయిలో పార్టీని తిరుగులేని శక్తిగా మార్చాలని ఆయన లక్ష్యంగా పెట్టుకున్నారు. ఈ ఎన్నికల కోసం కేవలం నాయకులపై ఆధారపడకుండా, త్వరలోనే పవన్ కళ్యాణ్ స్వయంగా జిల్లాల వారీగా విస్తృత పర్యటనలు చేసేందుకు సిద్ధమవుతున్నారు. పల్లెబాట పట్టి నేరుగా ప్రజలతో, సామాన్య కార్యకర్తలతో మమేకం కానున్నారు. మొత్తం మీద చూసుకుంటే, సార్వత్రిక ఎన్నికలకు ఇంకా మూడేళ్ల సమయం ఉందన్న రిలాక్సేషన్ లేకుండా, ఇప్పటి నుంచే సమర శంఖం పూరించేలా జనసేనానిలో స్పష్టమైన మార్పు కనిపిస్తోంది. ఈ ముందస్తు వ్యూహాలు ఏ మేరకు సత్ఫలితాలు ఇస్తాయో వేచి చూడాలి.
