స్వతంత్ర వెబ్ డెస్క్: వాల్తేరు వీరయ్య సక్సెస్ తర్వాత మెగాస్టార్ చిరంజీవి (Chiranjeevi) హీరోగా నటించిన చిత్రం భోళాశంకర్(Bhola Shankar). స్టైలిష్ ఫిల్మ్ మేకర్ మెహర్ రమేష్ ఈ సినిమాకు దర్శకత్వం వహించారు. ఇక ఈ సినిమాలో చిరంజీవికి జోడీగా తమన్నా భాటియా నటించగా… మహానటి కీర్తి సురేష్ చెల్లెలుగా నటించారు. సుశాంత్ ఈ సినిమాలో కీర్తికి లవర్ గా కనిపించారు. ఏకే ఎంటర్టైన్మెంట్స్ బ్యానర్ పై అనిల్ సుంకర భారీ బడ్జెట్ తో ఈ సినిమాను నిర్మించగా ఇక ఎన్నో అంచనాల నడుమ భోళా శంకర్ ఆగస్టు 11వ తేదీన (నేడు) థియేటర్లలోకి వచ్చింది. సినిమా ఎలా ఉంది అనేది రివ్యూలో చూద్దాం.
తమిళంలో సూపర్ హిట్ గా నిలిచిన వేదాళం(Vedalam) అనే సబ్జెక్టు తీసుకుని తెలుగు నేటివిటీకి తగినట్లుగా మార్పులు చేర్పులు చేసి ఈ సినిమాని తెరకెక్కించామని దర్శకుడు రమేష్ ముందు నుంచి చెబుతూనే ఉన్నారు. నిజానికి మెహర్ రమేష్ (Mehar Ramesh) ఒక అవుట్ డేటెడ్ డైరెక్టర్ అనే వాదన ముందు నుంచి అందరూ తెరమీదకు తెస్తూనే ఉన్నారు. దానికి కారణం ఆయన చివరిగా షాడో (Shadow)అనే సినిమాతో ప్రేక్షకుల ముందుకు వచ్చారు. అయితే మెగాస్టార్ చిరంజీవి లాంటి వ్యక్తి అవకాశం ఇచ్చారంటే ఏదో మ్యాజిక్ చేస్తాడని అందరూ నమ్మారు కానీ సినిమా మొదలైనప్పటి నుంచి ఆయన తన పనితనాన్ని ఎంతవరకు మెరుగుపరుచుకున్నాడో సగటు ప్రేక్షకుడికి కూడా ఈజీగా అర్థం అయిపోతుంది. వాస్తవానికి వేదాళం సినిమా నుంచి అక్రమ యువతుల ట్రాఫికింగ్ అనే ఒక విషయాన్ని తీసుకుని తెలుగు నేటివిటీకి తగిన మార్పులు చేర్పులు చేసిన మాట వాస్తవమే.
