తెలంగాణలో కాంగ్రెస్ ప్రభుత్వం కొలువుదీరి అప్పుడే రెండున్నరేళ్లు కావస్తోంది. కానీ ఇంతవరకు ముఖ్యమంత్రి రేవంత్ రెడ్డి మంత్రివర్గం పూర్తి స్థాయిలో భర్తీ కాలేదు. ఢిల్లీ చుట్టూ ఎన్నిసార్లు తిరిగినా క్యాబినెట్ విస్తరణపై ఇంకా ఎలాంటి స్పష్టత రాలేదు. అయితే మిగిలిపోయిన స్థానిక సంస్థల ఎన్నికలు ముగిసిన వెంటనే.. కేవలం రెండు స్థానాల విస్తరణ మాత్రమే కాకుండా ఏకంగా మంత్రివర్గ ప్రక్షాళన చేయాలని సీఎం రేవంత్ రెడ్డి ఒక మాస్టర్ ప్లాన్ సిద్ధం చేసినట్లు గాంధీ భవన్ వర్గాల్లో జోరుగా ప్రచారం సాగుతోంది. సగం కాలం పూర్తయినందున కొందరిని తప్పించి, కొత్తవారికి అవకాశం ఇవ్వడం ద్వారా వచ్చే అసెంబ్లీ ఎన్నికలకు పక్కా టీమ్ను రెడీ చేసుకునే పనిలో ఆయన పడ్డారు. ఇంతకీ రేవంత్ రెడ్డి చేయబోయే ఈ భారీ ప్రక్షాళనలో వేటు పడే మంత్రులు ఎవరు? హైకమాండ్ ఈ ప్రక్షాళనకు గ్రీన్ సిగ్నల్ ఇస్తుందా లేదా?
తెలంగాణలో కాంగ్రెస్ ప్రభుత్వం ఏర్పడి దాదాపు రెండున్నరేళ్ల పదవీకాలం పూర్తి కావస్తోంది. ముఖ్యమంత్రిగా రేవంత్ రెడ్డి బాధ్యతలు చేపట్టిన నాటి నుంచి నేటి వరకు మంత్రివర్గంలో రెండు కీలక స్థానాలు అలాగే ఖాళీగా ఉండిపోయాయి. ఎప్పటికప్పుడు ఈ ఖాళీలను భర్తీ చేస్తారని, క్యాబినెట్ విస్తరణ త్వరలోనే ఉంటుందని కాంగ్రెస్ వర్గాల్లో పెద్ద ఎత్తున ఊహాగానాలు వినిపిస్తూనే ఉన్నాయి. ముఖ్యమంత్రి రేవంత్ రెడ్డి ఢిల్లీ పర్యటనకు వెళ్లిన ప్రతిసారీ మంత్రివర్గ విస్తరణపై హైకమాండ్తో కచ్చితంగా చర్చిస్తారని ప్రచారం జరగడం.. తీరా ఆయన రిక్త హస్తాలతో వెనక్కి రావడం ఒక సాధారణ ప్రక్రియగా మారిపోయింది. అధిష్టానం వద్ద ఈ వ్యవహారం దీర్ఘకాలంగా పెండింగ్ పడుతుండటంతో పదవులపై ఆశలు పెట్టుకున్న సీనియర్ నేతలు, ఆశావహుల్లో తీవ్ర నిరాశ వ్యక్తమవుతోంది. తమ నిరీక్షణ ఇంకెన్నాళ్లు అంటూ వారు ఆవేదన చెందుతున్నారు.
మంత్రివర్గ విస్తరణ జాప్యం కావడానికి రాష్ట్రంలో వరుసగా జరుగుతున్న ఎన్నికలు కూడా ఒక ప్రధాన కారణంగా కనిపిస్తున్నాయి. రాష్ట్రంలో ఇప్పటికే గ్రామ పంచాయతీ, పలు మున్సిపాలిటీల ఎన్నికల ప్రక్రియ ముగిసింది. అయితే రాష్ట్ర రాజకీయాల్లో అత్యంత కీలకమైన గ్రేటర్ హైదరాబాద్ మున్సిపల్ కార్పొరేషన్ ఎన్నికలతో పాటు, గ్రామీణ స్థానిక సంస్థలైన ఎంపీటీసీ, జడ్పీటీసీ ఎన్నికలు ఇంకా జరగాల్సి ఉంది. ఈ మిగిలిపోయిన స్థానిక ఎన్నికల ప్రక్రియ పూర్తిగా ముగిసిన తర్వాతనే మంత్రివర్గ విస్తరణపై ఫోకస్ పెట్టాలని కాంగ్రెస్ అధిష్టానం, రాష్ట్ర నాయకత్వం ఒక అవగాహనకు వచ్చినట్లు తెలుస్తోంది. ఈ ఎన్నికల్లో పార్టీని గెలిపించే బాధ్యతను ఆశావహులపై పెట్టి, వారు తీసుకువచ్చే ఫలితాలను బట్టి క్యాబినెట్ బెర్తులు కేటాయించాలన్న వ్యూహం కూడా ఇందులో దాగి ఉందని విశ్లేషకులు భావిస్తున్నారు. అందుకే అప్పటి వరకూ ఈ విస్తరణ అంశాన్ని ఉద్దేశపూర్వకంగానే పెండింగ్లో పెట్టినట్లు సమాచారం.
అయితే మిగిలిన స్థానిక ఎన్నికలు ముగిసిన తర్వాత ముఖ్యమంత్రి రేవంత్ రెడ్డి కేవలం ఆ రెండు ఖాళీలను మాత్రమే భర్తీ చేసి ఊరుకోరని స్పష్టమవుతోంది. ప్రస్తుతం ఉన్న మంత్రివర్గంలో పూర్తి స్థాయి ప్రక్షాళన చేపట్టాలని ఆయన ఒక బలమైన నిర్ణయానికి వచ్చినట్లు కాంగ్రెస్ వర్గాల్లో జోరుగా చర్చ సాగుతోంది. ప్రభుత్వం ఏర్పడి రెండున్నరేళ్లు పూర్తవుతున్నందున, ఇప్పటి వరకు మంత్రిగా అవకాశం దక్కిన కొందరిని పదవుల నుంచి తప్పించి, వారి స్థానంలో కొత్త వారికి అవకాశం కల్పించాలన్నది రేవంత్ రెడ్డి ఆలోచనగా ఉంది. తద్వారా రాబోయే 2028 అసెంబ్లీ ఎన్నికల నాటికి ఒక పకడ్బందీ ఎలక్షన్ టీమ్ను సిద్ధం చేసుకోవాలని ఆయన భావిస్తున్నారు. ప్రభుత్వ పనులను వేగవంతం చేయడంతో పాటు, పార్టీని క్షేత్రస్థాయిలో ఉరకలెత్తించే నాయకులను ఈ కొత్త క్యాబినెట్లోకి తీసుకోవడం ద్వారా పూర్తి స్థాయి యాక్షన్ మోడ్లోకి వెళ్లాలని సీఎం పక్కా స్కెచ్ వేశారు.
ఈ ప్రక్షాళనలో మంత్రులపై వేటు వేయడానికి ప్రధానంగా రెండు అంశాలను ప్రామాణికంగా తీసుకోబోతున్నారు. మొదటిది సామాజిక సమీకరణాలు కాగా, రెండవది మంత్రుల పనితీరు. ప్రస్తుత మంత్రివర్గంలో సామాజిక వర్గాల వారీగా ఉన్న కొన్ని అసమతుల్యతలను సరిదిద్దే క్రమంలో కొందరిని తప్పించక తప్పని పరిస్థితులు నెలకొన్నాయి. అలాగే ఈ రెండున్నరేళ్ల కాలంలో మంత్రుల పనితీరు, వారి శాఖల ప్రగతి ఆధారంగా రూపొందించిన ప్రోగ్రెస్ రిపోర్టుల ఆధారంగా మరికొందరిని నిర్దాక్షిణ్యంగా బయటకు పంపాల్సిన అవసరం ఉందని ముఖ్యమంత్రి గట్టిగా భావిస్తున్నారు. కోర్ టీమ్లోని కొంతమంది ప్రధాన మంత్రులను అలాగే కొనసాగిస్తూనే, జిల్లాల వారీగా సమీకరణాలను మార్చి కొత్త వారికి అవకాశాలు కల్పిస్తే.. నాయకుల్లో ఉన్న అసంతృప్తి చాలా వరకు తగ్గిపోతాయన్న అంచనాలో రేవంత్ రెడ్డి ఉన్నారు. రొటేషన్ పద్ధతిలో అందరికీ సమాన అవకాశాలు కల్పించినట్లు అవుతుందన్నది ఆయన ప్రధాన వ్యూహంగా కనిపిస్తోంది.
ముఖ్యమంత్రి రేవంత్ రెడ్డి ఆలోచనలు, రాజకీయ ప్రణాళికలు ఒక స్పష్టమైన లక్ష్యంతో ఉన్నప్పటికీ వీటన్నింటికీ ఢిల్లీలోని కాంగ్రెస్ హైకమాండ్ నుంచి గ్రీన్ సిగ్నల్ రావాల్సి ఉంటుంది. ముఖ్యమంత్రి ఢిల్లీకి వెళ్లిన ప్రతిసారీ ఈ పూర్తి స్థాయి ప్రక్షాళన ప్రతిపాదనను పార్టీ పెద్దల ముందు ఉంచుతున్నారని, అయితే అధిష్టానం మాత్రం ఈ భారీ మార్పులకు ప్రస్తుతానికి సుముఖత వ్యక్తం చేయడం లేదని విశ్వసనీయ వర్గాల సమాచారం. ఏకకాలంలో కొందరు మంత్రులను పదవుల నుంచి తప్పిస్తే పార్టీలో అనవసరమైన వర్గపోరు, తీవ్ర అసమ్మతి తలెత్తే ప్రమాదం ఉందని హైకమాండ్ ఆందోళన చెందుతోంది. అందుకే ఈ ప్రతిపాదనను సున్నితంగా పక్కన పెడుతున్నట్లు తెలుస్తోంది. అయితే సీఎం రేవంత్ రెడ్డి మాత్రం తన నిర్ణయంపై వెనక్కి తగ్గకుండా, హైకమాండ్ను ఒప్పించడానికి సరైన సమయం కోసం ఓపికగా వేచి చూస్తున్నారు. స్థానిక సంస్థల ఎన్నికల ఫలితాలు వెలువడిన తర్వాత తన ప్రక్షాళన ప్రతిపాదనకు ఢిల్లీ పెద్దల నుంచి కచ్చితమైన ఆమోదం లభిస్తుందన్న పూర్తి విశ్వాసంతో ఆయన ఉన్నారు. మరి ఏం జరుగుతుందో వేచి చూడాలి.
