పోలవరం ప్రాజెక్ట్‌ జల విద్యుత్‌ కేంద్రంలో స్టేరింగ్‌ పనులు ప్రారంభం

పోలవరం జల విద్యుత్ కేంద్రంలో టర్బైన్‌ల ఏర్పాటులో కీలకమైన స్టే రింగ్​ల అమరిక పనులు ప్రారంభమయ్యాయి. స్టే రింగ్ అమరికను జెన్కో, MEIL అధికారులు పూజ చేసి ప్రారంభించారు. ఈ స్టే రింగ్​ల అమరికకు 320 మెట్రిక్ టన్నుల సామర్ధ్యం కలిగిన క్రాలర్ క్రేన్ వినియోగిస్తున్నారు. ఒక్కో స్టే రింగ్ 4 విభాగాలుగా ఉంటుంది. దీని బరువు 136 మెట్రిక్ టన్నులు. విద్యుత్ ఉత్పత్తికి వినియోగించే కప్లాన్ టర్బైన్​లు సమర్ధవంతంగా పనిచేయటంలో ఈ స్టే రింగ్​లు కీలక పాత్ర పోషిస్తాయి. ప్రాజెక్ట్​లో కీలకమైన నిర్మాణ పనులు దీని అమరిక తరువాత కొనసాగిస్తారు. జల విద్యుత్ కేంద్రంలో స్టే రింగ్​ల ఏర్పాటు తరువాతే టర్బైన్​ల అమరిక చేపడతారని ఎస్​ఈ రామభద్ర రాజు తెలిపారు. ప్రాజెక్ట్ పనుల్లో జాప్యం కాకుండా ఉండేందుకు అన్ని పనులు సమాంతరంగా చేస్తున్నట్లు చెప్పారు. నిర్దేశించిన సమయానికి ప్రాజెక్ట్ పూర్తి చేయాలని లక్ష్యంతో పని చేస్తున్నట్లు MEIL చీఫ్ ఆపరేటింగ్ ఆఫీసర్ సతీష్ బాబు అంగర తెలిపారు.