రాజకీయాల్లో శాశ్వత మిత్రులు, శాశ్వత శతృవులు ఉండరంటారు.. అందుకు నిదర్శనమా అన్నట్లుగా ఉంది మంగళగిరి ఎమ్మెల్యే ఆర్కే వ్యవహారం. రానున్న ఎన్నికల కోసం టికెట్ దక్కకపోవడంతో వైసీపీకి, ఎమ్మెల్యే పదవికి రాజీనామా సమర్పించారు ఆర్కే. దీంతో… ఎన్నికల వేళ ఇది వైసీపీకి పెద్ద షాక్‌గా అభివర్ణించారు అంతా. కానీ, ఆర్కే పార్టీ మారి, రెండు నెలలు అయిందో లేదో వెంటనే యూ టర్న్ తీసుకున్నారు. మళ్లీ వైసీపీలోకి వచ్చేశారు. జగన్ సమ క్షంలో పార్టీ కండువా కప్పుకున్నారు. దీంతో.. ఆయన అసలు ఎందుకు వైఎస్సార్ కాంగ్రెస్ పార్టీని వీడారు.. కాంగ్రె స్‌లోకి ఎందుకు వెళ్లారు.. మళ్లీ ఫ్యాన్ పార్టీలోకి ఎందుకు వచ్చారు ? దీనిపైనే ఇప్పుడు చర్చ సాగుతోంది. ఇంకా చెప్పాలంటే ఇదంతా కాంగ్రెస్‌ను దెబ్బకొట్టేందుకు ఆడిన డ్రామానా ? లేక టీడీపీని ఇబ్బందుల్లోకి నెట్టే ఎత్తుగడా ? అసలేం జరిగింది ?
రాజకీయాలంటేనే ఎత్తులు పైఎత్తులు, వ్యూహాలు ప్రతివ్యూహాలు. ఒకరు ఓ ఎత్తు వేసేలోపే ఇంకొకరు దాన్ని అర్థం చేసుకొని పైఎత్తు వేయాల్సి ఉంటుంది. అలా అలర్ట్‌గా ఉండకపోతే చివరకు మొదటికే మోసం వస్తుంది. మామూలూ రోజుల్లోనే పరిస్థితి ఇలా ఉంటే… ఇక ఎన్నికల వేళ ఎలా ఉంటుందన్న సంగతి ఇక చెప్పాల్సిందేముంది ? అవును.. ఇప్పుడు ఆంధ్రప్రదేశ్‌లో జరుగుతోంది ఇదేనన్న వాదన విన్పిస్తోంది.
సార్వత్రిక ఎన్నికల వేళ విపక్షాలకు.. ప్రత్యేకించి చెప్పాలంటే ఏపీ కాంగ్రెస్‌కు ఊహించని షాక్ ఇది. నిజమే.. కొద్ది రోజు ల క్రితమే వైసీపీ నుంచి వచ్చి కాంగ్రెస్ గూటికి చేరారు ఎమ్మెల్యే ఆళ్ల రామకృష్ణారెడ్డి. అయితే… ఎవరూ ఊహించని విధంగా మళ్లీ వైసీపీ గూటికి చేరారాయన. తన సోదరుడు ఆళ్ల అయోధ్య రామిరెడ్డితో వచ్చి ఏపీ సీఎం జగన్‌తో సమావే శమయ్యారు. వైసీపీ కండువా కప్పుకున్నారు. దీంతో ఏపీ రాజకీయాల్లో ఒక్కసారిగా ఏం జరుగుతోందో తెలియని పరిస్థి తి. సొంత గూటికి వచ్చిన సందర్భంగా పలు కీలక వ్యాఖ్యలు చేశారు ఎమ్మెల్యే ఆర్కే. జగన్ పాలనలో అన్ని వర్గాలకు న్యాయం జరుగుతోందన్నారు. వైనాట్ 175లో భాగం అయ్యే ఉద్దేశంతోనే తాను మళ్లీ వైసీపీలోకి వచ్చినట్లు చెప్పుకొచ్చా రాయన. అంతేకాదు… గతంలో వైఎస్ రాజశేఖర్‌రెడ్డిని ఓడించేందుకు అందరూ ఏకమైనట్లుగా జగన్ విషయం లోనూ ఇలాగే చేస్తున్నారంటూ విమర్శలు గుప్పించారు ఆర్కే. మరో 20 ఏళ్లపాటు జగనే ముఖ్య మంత్రిగా ఉండాలని, అందు కు తన వంతుగా కృషి చేయాలని మళ్లీ వైసీపీలోకి వచ్చినట్లు తెలిపారు రామకృష్ణారెడ్డి. ఇక.. పార్టీ మారే విషయాన్ని ఏపీ పీసీసీ చీఫ్‌ వైఎస్ షర్మిలకు సైతం వెల్లడించేదన్నారు ఆర్కే. కుమారుడి పెళ్లి పనుల్లో షర్మిల బిజీగా ఉన్నందువల్లే ఆమెకు చెప్పలేదన్నా రాయన. అదే సమయంలో జగన్ ఏ బాధ్యత ఇచ్చినా సక్రమంగా నిర్వర్తిస్తామన్నారు. అటు.. మంగళగిరి నుంచి పోటీ చేయనున్న టీడీపీ జాతీయ ప్రధాన కార్యదర్శి నారా లోకేషన్‌ను రానున్న ఎన్నికల్లో తప్పకుం డా ఓడిస్తామన్నారు ఆర్కే. 2019 ఎన్నికల్లో ఓసీ చేతిలో ఓడిన లోకేష్, రానున్న ఎన్నికల్లో బీసీ చేతిలో ఓడిపోవడం ఖాయమన్నారు ఆర్కే.
నిజానికి ఆర్కే పార్టీ మారడానికి ప్రధాన కారణం… వైసీపీ పార్టీ మొదలు పెట్టిన నియోజకవర్గాల ఇన్‌ఛార్జ్‌ల మార్పు లు-చేర్పులే. సార్వత్రిక ఎన్నికలకు సిద్ధమవుతున్న వైసీపీ.. ఇన్‌ఛార్జ్‌ల మార్పులు చేర్పుల పేరుతో అసెంబ్లీ, పార్లమెం టు ఎన్నికలకు అభ్యర్థుల్ని ప్రకటిస్తూ వస్తోంది. ఇప్పటికే 60కి పైగా అసెంబ్లీ నియోజకవర్గాలకు ఇన్‌ఛార్జ్‌లను ప్రకటిం చారు వైసీపీ అధినేత, ఏపీ సీఎం జగన్. ఇందులో భాగంగా మొట్ట మొదటి లిస్ట్‌లోనే మంగళగిరి ఎమ్మెల్యే ఆళ్ల రామ కృష్ణారెడ్డిని తప్పిస్తూ సంచలన నిర్ణయం తీసుకున్నారు. దీంతో.. అప్పట్లో ఆ నిర్ణయంపై రాష్ట్ర వ్యాప్తంగా చర్చ సైతం జరిగింది. అయితే..అప్పుడు వైసీపీ పెద్దలపై ఆగ్రహించిన ఆర్కే.. పార్టీకి, ఎమ్మెల్యే పదవికి రాజీనామా చేస్తూ నిర్ణయం తీసుకున్నారు. మొదట్లో ఆయన టీడీపీలోకి వెళ్తారన్న ఊహాగానాలు విన్పించినా, షర్మిళ ఏపీ కాంగ్రెస్ బాధ్యతలు చేప ట్టడంతో ఎవరి ఊహకూ అందని రీతిలో ఆయన కాంగ్రెస్ పార్టీలో చేరారు. కానీ, అక్కడ ఎదురైన పరిస్థితుల కారణం గానే ఆయన మళ్లీ వైసీపీలోకి వచ్చారన్న ప్రచారం జరుగుతోంది. అయితే.. ఇందులోనే అనేక ప్రశ్నలు విన్పిస్తున్నాయి. ఆర్కే వచ్చీ రావడంతోనే జగన్‌ను ఎదుర్కొనేందుకు అందరూ ఏకమయ్యారని.. రానున్న ఎన్నికల్లో లోకేష్‌కు ఓటమి తప్పదని వ్యాఖ్యానించారు. దీంతో.. ఆర్కే బయటకు రావడం, మళ్లీ వైసీపీలోకి వెళ్లడం అంతా ఓ ప్లాన్ ప్రకారమే జరిగిందా అన్న చర్చ ఇప్పుడు మొదలైంది. అయితే… ఆళ్లవి అన్నీ డ్రామాలే అని ఆరోపిస్తోంది ప్రధాన ప్రతిపక్షం టీడీపీ. అసలు ఆయన ఎందుకు వైసీపీ నుంచి బయటకు వచ్చారు… మళ్లీ ఎందుకు వెనక్కు వెళ్లారంటూ మండి పడుతోంది.అయితే…
ఈ మొత్తం వ్యవహారం గమనిస్తే… ఇదంతా ఓ కోవర్టు ఆపరేషన్ అనేవాళ్లూ లేకపోలేదు. అందుకు నిదర్శనమా అన్నట్లుగా జగన్‌కు మొన్నటి వరకు వీర విధేయుడిగా ఉన్న ఆర్కే.. పార్టీ నుంచి బయటకు వెళ్లడం, పెద్దగా ఎలాంటి విమర్శలు చేయకపోవడం, మళ్లీ వైసీపీ కండువా కప్పుకోగానే.. ఏపీ సీఎంపై విపక్షాల మూకుమ్మడి పోరు గురించి, అలాగే… నారా లోకేష్‌కు ఓటమి తప్పదని చెప్పడం.. ఇలా ఆయన చేసిన వ్యాఖ్యలు జాగ్రత్తగా గమనించాలనే అభిప్రాయాన్ని వ్యక్తం చేస్తున్నారు రాజకీయ విశ్లేషకులు. ఎమ్మెల్యే ఆర్కే ఎపిసోడ్‌తో ఇప్పుడు కొత్త కొత్త అనుమానాలు తలెత్తుతున్నాయి ప్రతిపక్షాల్లో. ఆళ్ల మాదిరిగా ఇంకెవరైనా ఉన్నారా అనే దిశగా ఆయా పార్టీలు ఆలోచిస్తున్నట్లు సమాచారం.