హైదరాబాద్ బాలాపూర్‌లో దారుణం

పదిహేనేళ్ల కాపురంలో అనుమానం ఒక నిండు ప్రాణాన్ని బలిగొంది. భార్య ప్రవర్తనపై పెంచుకున్న అపనమ్మకంతో కట్టుకున్న భర్తే కసాయిగా మారి ఆమె గొంతుకోసి అత్యంత కిరాతకంగా హతమార్చిన దారుణ ఘటన హైదరాబాద్ బాలాపూర్ పీఎస్‌ పరిధిలో వెలుగుచూసింది. ఈ ఘటన స్థానికంగా తీవ్ర కలకలం రేపింది, మృతురాలి కుటుంబంలో విషాద ఛాయలు అలుముకున్నాయి.
————
పోలీసులు తెలిపిన వివరాల ప్రకారం.. పశ్చిమ బెంగాల్‌లోని ఉత్తర దినజ్‌పూర్ జిల్లాకు చెందిన మహమ్మద్ ముస్తఫా, అజ్మీరా బేగం భార్యాభర్తలు. బతుకుదెరువు కోసం కొద్ది సంవత్సరాల క్రితం ఉపాధి వెతుక్కుంటూ నగరానికి వలస వచ్చిన ఈ దంపతులు, బాలాపూర్ ప్రాంతంలోని న్యూ బాబా నగర్‌లో నివాసం ఉంటున్నారు. వివాహం జరిగి పదిహేనేళ్లు గడిచినప్పటికీ, ముస్తఫా తన భార్య అజ్మీరా బేగంపై ఎల్లప్పుడూ అనుమానం పెంచుకుంటూ ఉండేవాడు. ఇదే విషయమై గతంలోనూ వారి మధ్య తరచూ గొడవలు జరిగేవి.
————
ఈ క్రమంలో సోమవారం రాత్రి వీరిద్దరి మధ్య వ్యక్తిగత విషయాలపై మరోసారి తీవ్ర వాగ్వాదం జరిగింది. కోపోద్రిక్తుడైన ముస్తఫా తనలోని రాక్షసత్వాన్ని బయటపెట్టాడు. భార్య ప్రవర్తనపై ఉన్న కక్షతో క్షణికావేశంలో ఆమె గొంతు కోసి కిరాతకంగా హతమార్చాడు. ఇంట్లోనే రక్తపు మడుగులో పడి అల్లాడుతూ అజ్మీరా బేగం ప్రాణాలు కోల్పోయింది. భార్య మృతి చెందిందని గ్రహించిన నిందితుడు ముస్తఫా, భయంతో వెంటనే అక్కడి నుంచి పరారయ్యాడు.
————
మంగళవారం మధ్యాహ్నం బాలాపూర్‌లోని ఓ హోటల్‌లో తలదాచుకున్న నిందితుడి ఆచూకీ తెలుసుకున్న పోలీసులు, చాకచక్యంగా వలపన్ని అదుపులోకి తీసుకున్నారు. పోలీసుల విచారణలో భాగంగా ముస్తఫా తాను చేసిన నేరాన్ని అంగీకరించినట్లు అధికారులు వెల్లడించారు. హత్యకు ఉపయోగించిన పదునైన ఆయుధంతో పాటు నిందితుడి సెల్ ఫోన్, హత్య సమయంలో ధరించిన రక్తపు మరకలు ఉన్న దుస్తులను పోలీసులు స్వాధీనం చేసుకున్నారు.
————
ఈ దారుణ ఘటనపై బాలాపూర్ పోలీసులు కేసు నమోదు చేసుకుని, బీఎన్ఎస్ చట్టంలోని వివిధ సెక్షన్ల కింద దర్యాప్తు చేపట్టారు. నిందితుడిని స్థానిక న్యాయస్థానంలో హాజరుపరిచి, న్యాయమూర్తి ఆదేశాల మేరకు జ్యుడీషియల్ రిమాండ్‌కు తరలించినట్లు పోలీసులు తెలిపారు. పదేళ్ల పైగా సాగిన వైవాహిక జీవితం అనుమానం కారణంగా ఇలా విషాదాంతం కావడం స్థానికంగా చర్చనీయాంశమైంది.