స్కిల్ డెవలప్ మెంట్ కేసులో టీడీపీ అధ్యక్షుడు చంద్రబాబు బెయిల్ రద్దు పిటిషన్ విచారణను సుప్రీంకోర్టు మరోసారి వాయిదా వేసింది. మూడు వారాల తర్వాత పిటిషన్‌పై తదుపరి విచారణ ఉంటుందని జస్టిస్‌ బేలా త్రివేది, జస్టిస్‌ పంకజ్‌ మిట్టల్‌ తో కూడిన ధర్మాసనం తెలిపింది. చంద్రబాబు బెయిల్ రద్దు చేయాలంటూ ప్రభుత్వం తరఫు న్యాయవాదులు సుప్రీంకోర్టును కోరారు.
చంద్రబాబు కుటుంబం ఒక డైరీలో అధికారుల పేర్లు నమోదు చేస్తోందని, వారు అధికారంలోకి వస్తే అందరిపై చర్యలు తీసుకుంటామని బెదిరిస్తోందని ఆరోపించారు. ఈ కేసులో బెయిల్ మంజూరు తర్వాత అనేక పరిణామాలు చోటు చేసుకున్నాయని, అధికారులను, దర్యాప్తు సంస్థను బెదిరిస్తున్నారని తెలిపారు. వెంటనే బెయిల్ రద్దు చేయడానికి అనేక కారణాలు ఉన్నాయని ప్రభుత్వం తరపు న్యాయవాది ముకుల్‌ రోహత్గీ అన్నారు.
మరోవైపు.. ప్రభుత్వం లేవనెత్తిన ప్రతి అంశానికి తాము సమాధానం ఇస్తామని చంద్రబాబు తరఫు న్యాయవాది హరీష్‌ సాల్వే అన్నారు. దీనిపై స్పందించిన ధర్మాసనం రెండు వారాల్లో కౌంటర్‌ దాఖలు చేయాలని ఆదేశించింది. మూడు వారాల తరువాత తదుపరి విచారణ చేపట్టనున్నట్లు ప్రకటించింది.