తెలంగాణ రాజకీయాల్లో కీలక పరిణామంగా భారత రాష్ట్ర సమితి పార్టీ అధినేత కేసీఆర్( K. Chandrashekar Rao) అధ్యక్షతన రేపు కీలక సమావేశం జరగనుంది. మధ్యాహ్నం 2 గంటలకు ఎర్రవల్లి(Erravalli) లోని కేసీఆర్ నివాసంలో ఈ సమావేశాన్ని నిర్వహించనున్నట్లు పార్టీ వర్గాలు వెల్లడించాయి. ఈ సమావేశానికి పార్టీ ప్రధాన కార్యదర్శులు, ఎమ్మెల్యేలు, ఎమ్మెల్సీలు, ముఖ్య నేతలు హాజరుకానున్నారు.
ప్రస్తుతం తెలంగాణలో మారుతున్న రాజకీయ పరిస్థితులు, పార్టీ భవిష్యత్ వ్యూహాల నేపథ్యంలో ఈ సమావేశానికి అత్యంత ప్రాధాన్యత ఏర్పడింది. ముఖ్యంగా ఇటీవల పార్టీ శ్రేణుల్లో నెలకొన్న అయోమయం, కేడర్లో ఉత్సాహం పెంచాల్సిన అవసరం, రాబోయే ఎన్నికల దృష్ట్యా సంస్థాగత బలోపేతంపై కేసీఆర్ దృష్టి పెట్టినట్లు తెలుస్తోంది.
సమావేశంలో ప్రధానంగా పార్టీ సంస్థాగత నిర్మాణంపై విస్తృత చర్చ జరగనుంది. గ్రామస్థాయి నుంచి రాష్ట్రస్థాయి వరకు పార్టీ కమిటీల పునర్వ్యవస్థీకరణ, కొత్త ఇన్చార్జ్ల నియామకం, సభ్యత్వ నమోదు కార్యక్రమంపై స్పష్టమైన దిశానిర్దేశం ఇవ్వనున్నట్లు సమాచారం. ఇటీవల కొన్ని నియోజకవర్గాల్లో పార్టీ కార్యకలాపాలు మందగించడం, నాయకుల మధ్య అంతర్గత విభేదాలు పెరగడం వంటి అంశాలపై కూడా కేసీఆర్ ఆరా తీయనున్నట్లు తెలుస్తోంది.
అలాగే పార్టీకి మళ్లీ పూర్వ వైభవం తీసుకురావాలంటే క్షేత్రస్థాయిలో కేడర్ను బలోపేతం చేయాలని కేసీఆర్ భావిస్తున్నట్లు పార్టీ వర్గాలు చెబుతున్నాయి. అందులో భాగంగా ప్రతి నియోజకవర్గానికి ప్రత్యేక ఇన్చార్జ్ల నియామకం, సభ్యత్వ నమోదు లక్ష్యాల నిర్ధారణ, ప్రజల్లోకి వెళ్లే కార్యక్రమాలపై ప్రత్యేక కార్యాచరణ రూపొందించే అవకాశం ఉందని సమాచారం.
ఇటీవల అధికార కాంగ్రెస్ పార్టీపై బీఆర్ఎస్ దాడి పెంచుతున్న నేపథ్యంలో, ప్రభుత్వ వైఫల్యాలను ప్రజల్లోకి ఎలా తీసుకెళ్లాలనే అంశంపై కూడా చర్చ జరిగే అవకాశం ఉంది. రైతు సమస్యలు, నిరుద్యోగం, హామీల అమలు, ఆర్థిక పరిస్థితులు వంటి అంశాలపై ఉద్యమ కార్యాచరణ సిద్ధం చేయాలని కేసీఆర్ నాయకులకు సూచించే అవకాశముంది.
ప్రస్తుతం పార్టీ కార్యకలాపాలకు దూరంగా ఉంటున్న కేసీఆర్ స్వయంగా సమావేశానికి అధ్యక్షత వహించడంతో బీఆర్ఎస్ శ్రేణుల్లో ఉత్సాహం నెలకొంది. ఈ సమావేశం ద్వారా పార్టీ భవిష్యత్ దిశపై స్పష్టత వచ్చే అవకాశముందని నేతలు భావిస్తున్నారు. తెలంగాణ రాజకీయాల్లో ఈ భేటీకి ప్రత్యేక ప్రాధాన్యత ఏర్పడింది.
