తెలుగు ఫిలిం ఇండస్ట్రీ ఎంప్లాయిస్ ఫెడరేషన్ ఎన్నికల్లో ప్రస్తుత అధ్యక్షులు అనిల్ కుమార్ వల్లభనేని ప్యానెల్ ఘన విజయాన్ని సాధించింది. 2023-2025 సంవత్సరానికి గాను ఫెడరేషన్ అధ్యక్షుడిగా అనిల్ కుమార్ వల్లభనేని, సెక్రటరీ గా పీఎస్ఎన్ దొరను ఏకగ్రీవంగా ఎన్నుకున్నారు. ఈ ఎన్నికల్లో 24 కార్మిక సంఘాల నాయకులు, కార్మిక సోదర సోదరిమణులు పాల్గొన్నారు. అలాగే కోశాధికారిగా పోటీ చేసిన సురేష్ గెలుపొందారు. కోశాధికారి పదవికి ఫెడరేషన్ మొత్తం ఓట్లు 72 కాగా… ఇందులో 60 ఓట్లు పోలయ్యాయి. అందులో సతీష్ కు 16 ఓట్లు రాగా.. సురేష్ కు 44 ఓట్లు వచ్చాయి. 28 ఓట్ల మెజారిటీతో సురేష్ కోశాధికారిగా గెలుపొందారు.
ఈ సందర్బంగా అనిల్ కుమార్ మాట్లాడుతూ… మరోసారి తమ ప్యానెల్ పై నమ్మకం ఉంచి ఘన విజయాన్ని అందించిన కార్మిక సోదర సోదరీమణులకు, 24 కార్మిక సంఘాల నాయకులకు,అభివృద్ధికి తహకరించిన శ్రేయోభిలాషులకు ధన్యవాదములు తెలిపారు. సినిమా ఇండస్ట్రీ లో ఉన్న 25 వేల మంది సినిమా కార్మికుల కష్టనష్టాలు తెలిసిన నాయకులుగా మరొకమారు మమ్మల్ని కార్మికులు గుర్తించినందుకు సంతోషంగా ఉంది. మా మీద ఉన్న నమ్మకాన్ని వమ్ము చేయకుండా అందరిని కలుపుకొని ముందుకు సాగుతానని అన్నారు. ఈ గెలుపు 24 సంఘాల సినిమా కార్మికులదేనని తెలియజేస్తూ… ఫెడరేషన్ మాజీ అధ్యక్షులు కొమర వెంకటేష్ కి, వికాస్ కు ఈ గెలుపును అంకితం చేశారు.