ఆంధ్రప్రదేశ్ ముఖ్యమంత్రి చంద్రబాబు నాయుడు కేంద్ర హోంమంత్రి అమిత్ షాతో కీలక భేటీ నిర్వహించారు. ఢిల్లీలో జరిగిన ఈ సమావేశంలో రాష్ట్రానికి సంబంధించిన పలు ముఖ్యమైన అంశాలపై ఇరువురు నేతలు విస్తృతంగా చర్చించినట్లు సమాచారం. ముఖ్యంగా ఆంధ్రప్రదేశ్ విభజన హామీల అమలులో ఇంకా పెండింగ్లో ఉన్న అంశాలను కేంద్రం త్వరితగతిన పరిష్కరించాలని చంద్రబాబు కోరినట్లు తెలుస్తోంది.
అమరావతి రాజధాని అభివృద్ధిపై కూడా ఈ సమావేశంలో ప్రత్యేకంగా చర్చ జరిగినట్లు సమాచారం. అమరావతిలో మరిన్ని కేంద్ర ప్రభుత్వ సంస్థలను ఏర్పాటు చేయాలని సీఎం చంద్రబాబు ప్రతిపాదనలు సమర్పించినట్లు తెలిసింది. అలాగే రాజధాని నిర్మాణ పనులకు కేంద్రం నుంచి ఆర్థిక సహకారం మరింత పెంచాలని ఆయన విజ్ఞప్తి చేశారు.
ఇక రాష్ట్రానికి అత్యంత కీలకమైన పోలవరం ప్రాజెక్టుకు సంబంధించిన నిధుల విడుదలలో ఎలాంటి జాప్యం లేకుండా చర్యలు తీసుకోవాలని అమిత్ షాను చంద్రబాబు కోరారు. ప్రాజెక్టు పనుల ప్రస్తుత పరిస్థితిని వివరించి, త్వరితగతిన నిధులు విడుదలైతే నిర్మాణం వేగవంతం అవుతుందని తెలిపారు.
అదేవిధంగా సహకార శాఖ పరిధిలో రాష్ట్రానికి మరింత మద్దతు అందించాలని కూడా సీఎం అభ్యర్థించినట్లు సమాచారం. రాష్ట్ర అభివృద్ధికి కేంద్రం పూర్తి సహకారం అందిస్తుందనే ఆశాభావాన్ని చంద్రబాబు వ్యక్తం చేశారు.
