యనమలకు మళ్లీ టీడీపీలో ప్రాధాన్యత పెరుగుతోందా?

తెలుగుదేశం పార్టీ పండుగ మహానాడుకు రంగం సిద్ధమైంది. ఈ నెలలో నెల్లూరు వేదికగా అత్యంత ప్రతిష్టాత్మకంగా జరగనున్న ఈ సమావేశాల్లో ఆ పార్టీ తీసుకునే తీర్మానాలు రాష్ట్ర రాజకీయాల్లో అత్యంత కీలకం కానున్నాయి. ఈ తీర్మానాల రూపకల్పన బాధ్యతను పార్టీ అధిష్టానం సీనియర్ నేత యనమల రామకృష్ణుడి భుజస్కంధాలపై పెట్టింది. ఆయన రాజకీయంగా రిటైర్ అయ్యారన్న ప్రచారానికి చెక్ పెడుతూ.. కీలక బాధ్యతలు అప్పగించడం చర్చనీయాంశమైంది. దానికి తోడు నారా లోకేష్ జాతీయ వర్కింగ్ ప్రెసిడెంట్ అయ్యాక జరుగుతున్న తొలి మహానాడు కావడంతో దీనిపై సర్వత్రా ఆసక్తి నెలకొంది. ఇంతకీ సీనియారిటీకి పెద్దపీట వేస్తూ యనమలకు ఈ కీలక బాధ్యతలు అప్పగించడం వెనుక ఉన్న అసలు వ్యూహం ఏమిటి? రాబోయే రాజ్యసభ ఎన్నికల్లో యనమలకు పెద్దల సభకు వెళ్లే అవకాశం మళ్లీ దక్కబోతోందా?

ఉమ్మడి ఆంధ్రప్రదేశ్ రాజకీయాల్లో, తెలుగుదేశం పార్టీ చరిత్రలో యనమల రామకృష్ణుడు ఒక బలమైన అధ్యాయం. పార్టీ ఆవిర్భావ సమయం, అంటే 1983 నుంచి ఆయన తెలుగుదేశం పార్టీలో కొనసాగుతున్నారు. పార్టీ వ్యవస్థాపకుడు ఎన్టీ రామారావు మెచ్చిన నాయకుడిగా ఎదిగి, ఆయన మంత్రివర్గంలో న్యాయ శాఖ మంత్రిగా అత్యంత సమర్థవంతంగా పనిచేశారు. ఆ తర్వాత కాలంలో చంద్రబాబు నాయుడికి అత్యంత నమ్మకస్తుడిగా, సమకాలీనుడిగా టీడీపీలో ఏ దశాబ్దంలోనూ చెక్కుచెదరని ముఖ్య స్థానంలో ఆయన కొనసాగుతూ వస్తున్నారు. పార్టీ అత్యున్నత నిర్ణాయక మండలి అయిన పొలిట్ బ్యూరోలో కూడా యనమలకు అధిష్టానం శాశ్వత స్థానాన్ని కల్పించింది. అయితే వయసు రిత్యా యనమల రాజకీయంగా రిటైర్ అయిపోయారని, ఆయనను పార్టీ నాయకత్వం నెమ్మదిగా దూరం పెడుతోందని ఇటీవల కాలంలో పలు రాజకీయ ఊహాగానాలు వచ్చాయి. వాటన్నింటినీ పటాపంచలు చేస్తూ, పార్టీలో ఆయనకున్న అపారమైన అనుభవానికి సముచిత స్థానం ఇస్తూ అధిష్టానం ఆయన ప్రాధాన్యతను మరోసారి స్పష్టం చేసింది. సీనియర్ల అవసరం పార్టీకి ఎప్పుడూ ఉంటుందని చంద్రబాబు నాయుడు చేతల ద్వారా నిరూపించారు.

ఈ నెలలో జరగనున్న టీడీపీ మహానాడు సమావేశాలు భవిష్యత్ రాజకీయాలకు ఒక స్పష్టమైన దిశానిర్దేశం చేయబోతున్నాయి. ప్రతి ఏటా నిర్వహించే మహానాడు వేదికగా, తెలుగుదేశం పార్టీ జాతీయ, రాష్ట్ర స్థాయి అంశాలను అత్యంత లోతుగా చర్చిస్తూ ఉంటుంది. ప్రజా సమస్యలపైన, ప్రభుత్వ విధానాలపైన ప్రతి విషయం మీద సుదీర్ఘంగా చర్చించి అధికారికంగా తీర్మానాలు ప్రవేశపెడతారు. ముఖ్యంగా సమకాలీన రాజకీయ, ఆర్ధిక, సామాజిక అంశాల మీద పార్టీ వైఖరిని స్పష్టం చేసే బలమైన తీర్మానాలు ఉంటాయి. ఇంతటి కీలకమైన ఈ తీర్మానాలను తయారు చేసే బాధ్యతలను అనుభవజ్ఞుడైన సీనియర్ నేతగా యనమల రామకృష్ణుడికి అధిష్టానం అప్పగించింది. నాలుగు దశాబ్దాలుగా టీడీపీకి ఒక మార్గదర్శకుడిగా, పార్టీ సిద్ధాంత కర్తగా, పాలనాపరమైన విషయాల్లో వెన్నెముకగా ఉన్న యనమలకు ఇప్పుడు ఈ ప్రధాన పదవిని ఇవ్వడం ద్వారా ఆయన బాధ్యతలను నాయకత్వం మరింత పెంచింది. ఆయన అపారమైన మేధస్సును, చట్టాలపై ఆయనకున్న అవగాహనను పార్టీ భవిష్యత్ కార్యాచరణ కోసం పూర్తి స్థాయిలో వాడుకుంటోంది.

ప్రస్తుతం దేశంలో నెలకొన్న రాజకీయ పరిస్థితులతో పాటు, దక్షిణ భారతదేశ ప్రాంతీయ పరిణామాలు, రెండు తెలుగు రాష్ట్రాల రాజకీయాల మీద ఈ తీర్మానాల్లో కూలంకషమైన చర్చ సాగుతుంది. ముఖ్యంగా కేంద్ర, రాష్ట్ర ప్రభుత్వాల ఆర్థిక విధానాలు, కీలకమైన ఆర్ధిక అంశాలపై పార్టీ తీసుకునే నిర్ణయాలు మహానాడులో ఆసక్తికరంగా మారబోతున్నాయి. ఈ అత్యంత ముఖ్యమైన తీర్మానాలను తయారు చేసే కమిటీకి యనమల రామకృష్ణుడు కన్వీనర్ గా వ్యవహరిస్తారు. ఆయనకు దన్నుగా కో కన్వీనర్లుగా సీనియర్ నేతలు సోమిరెడ్డి చంద్రమోహన్ రెడ్డి, కాల్వ శ్రీనివాసులు, గురజాల మాల్యాద్రి వ్యవహరించనున్నారు. ఈ కమిటీలో యువతకు, అనుభవజ్ఞులకు సమపాళ్లలో ప్రాధాన్యత కల్పించారు. సభ్యులుగా పయ్యావుల కేశవ్, నిమ్మల రామానాయుడు, వంగలపూడి అనిత, ఎస్ సవిత, ఎం ఏ షరీఫ్, నక్క ఆనందబాబు, వర్ల రామయ్య, కిమిడి కళా వెంకట్రావు, పి అశోక్ బాబు, పంచుమర్తి అనూరాధ, తదితర ముఖ్య నాయకులు ఉన్నారు. వీరందరి ఆలోచనలను, క్షేత్రస్థాయి నివేదికలను క్రోడీకరించి యనమల నేతృత్వంలో మహానాడు తీర్మానాలకు తుది రూపం ఇవ్వనున్నారు.

ఈసారి మహానాడు పండుగను తెలుగుదేశం పార్టీ నెల్లూరు వేదికగా అత్యంత ప్రతిష్టాత్మకంగా, కన్నుల పండువగా నిర్వహిస్తోంది. దశాబ్దాల చరిత్ర ఉన్న పార్టీలో నెల్లూరు మహానాడుకు ఒక ప్రత్యేకమైన స్థానం ఉండబోతోంది. నారా లోకేష్ అధికారికంగా టీడీపీ జాతీయ వర్కింగ్ ప్రెసిడెంట్ బాధ్యతలు చేపట్టిన తర్వాత జరుగుతున్న మొట్టమొదటి మహానాడు సమావేశం ఇదే కావడం విశేషం. యువ నాయకుడి మార్గదర్శకత్వంలో మహానాడు ఏ స్థాయిలో జరగబోతోంది, ఆయన ఎలాంటి దిశానిర్దేశం చేయబోతున్నారన్న దానిపైన పార్టీ శ్రేణుల్లోనే కాకుండా, రాజకీయ వర్గాల్లోనూ తీవ్ర ఆసక్తి నెలకొంది. ఒకవైపు యువ నాయకుడు నారా లోకేష్ ఉత్సాహం, ఆయన ప్రణాళికలు ఉండగా, మరోవైపు సీనియర్ నేత యనమల అనుభవంతో కూడిన తీర్మానాల రూపకల్పన జరగబోతోంది. ఈ కలయికతో మహానాడు ఏ విషయాల మీద ఎలాంటి సంచలన తీర్మానాలు చేస్తుందన్నది సర్వత్రా ఆసక్తి రేపుతోంది. సభ్యుల సలహాలు, లోకేష్ సూచనలతో పార్టీని మరింత ముందుకు నడిపించేలా ఈ తీర్మానాలు ఉండబోతున్నాయని పార్టీ ముఖ్య నేతలు స్పష్టం చేస్తున్నారు.

తాజా రాజకీయ పరిణామాలు, మహానాడు బాధ్యతలను నిశితంగా పరిశీలిస్తే యనమల రామకృష్ణుడికి తెలుగుదేశం పార్టీ టాప్ ప్రయారిటీ ఇస్తోందన్న వాస్తవం స్పష్టంగా అర్థమవుతోంది. దశాబ్దాలుగా పార్టీ కోసం కష్టపడిన వారికి, విధేయతగా ఉన్న నేతలకు ఎప్పుడూ సముచిత స్థానం ఉంటుందని అధిష్టానం ఈ నిర్ణయం ద్వారా పార్టీ శ్రేణులకు ఒక బలమైన సందేశాన్ని పంపింది. ఇదే సమయంలో వచ్చే నెలలో జరగనున్న రాజ్యసభ ద్వైవార్షిక ఎన్నికలపైన కూడా పార్టీలో అంతర్గతంగా ఆసక్తికరమైన చర్చ నడుస్తోంది. మహానాడు తీర్మానాల రూపకల్పన కమిటీ కన్వీనర్ గా ఇంతటి కీలక బాధ్యతలు చేపట్టిన యనమలకు, వచ్చే నెలలో ఖాళీ అవుతున్న రాజ్యసభ సీట్లలో ఒకటి కచ్చితంగా దక్కుతుందన్న ప్రచారం రాజకీయ వర్గాల్లో బలంగా వినిపిస్తోంది. చట్టసభల్లో ఆయనకున్న అనుభవాన్ని, జాతీయ స్థాయి రాజకీయాల్లో ఆయనకున్న పరిచయాలను పెద్దల సభలో వినియోగించుకోవాలని అధిష్టానం భావిస్తున్నట్లు సమాచారం. ఈ పరిణామాలన్నీ యనమల పొలిటికల్ కెరీర్‌లో మరో నూతన అధ్యాయానికి నాంది పలుకుతున్నాయి.