తెలంగాణ అసెంబ్లీ పది నిమిషాలు ఆలస్యంగా ప్రారంభం కావడంపై బీఆర్ఎస్ అభ్యంతరం వ్యక్తం చేసింది. సభ సమయపాలన పాటించాలని మాజీ మంత్రి హరీశ్‌రావు సూచించారు. రోజూ ఆలస్యంగా సభ ప్రారంభమవుతుందని .. అందరికీ ఆదర్శంగా ఉండాలని చెప్పారు. సభ ఇలా ఆలస్యంగా జరిగితే ఎలా అని ప్రశ్నించారు హరీశ్‌రావు.
హరీశ్‌రావు వ్యాఖ్యలపై ఎమ్మెల్యే యెన్నం శ్రీనివాస్‌రెడ్డి అభ్యంతరం తెలిపారు. ఏదో ఒక సాకుతో సభ సరిగా జరగడం లేదని చెప్పాలని బీఆర్ఎస్ ప్రయత్నిస్తోందన్నారు. సభ ఎప్పుడు మొదలైంది అన్నది ముఖ్యం కాదని చెప్పారు. సభలో ఎంత సేపు చర్చించామన్నదే ముఖ్యమని అన్నారు యెన్నం శ్రీనివాస్‌ రెడ్డి.