తెలంగాణలో పద్మ అవార్డుల వివాదం చిలికి చిలికి గాలివాన మారుతోంది. ఈనేపథ్యంలోనే బండి సంజయ్ సంచలన ఆరోపణలు చేశారు. కేంద్రం రాష్ట్రానికి అవార్డుల ఎంపికలో తీవ్ర అన్యాయం చేసిందని సీఎం మండిపడగా, దానికి కౌంటర్‌గా కేంద్రమంత్రి తీవ్ర ఆరోపణలు చేశారు. ఇంతకు కేంద్రమంత్రి చేసిన ఆరోపణలు ఏంటి.? కాంగ్రెస్ శ్రేణులు ఇంతలా రియాక్ట్ అవడానికి కారణం ఏంటి..?
పద్మ అవార్డుల విషయంలో తెలంగాణపై కేంద్రం వివక్ష చూపిందని.. సీఎం రేవంత్‌రెడ్డి ఆరోపణలకు దిగారు. ఈ ఆరోపణలకు బండి సంజయ్ కౌంటర్‌గా స్పందించారు. పద్మ అవార్డులు స్థాయి ఉన్న వారికి ఇస్తామని చెప్పారు. గద్దర్‌కు ఎలా ఇస్తామని.. ఆయన భావజాలం ఏంటి.. బీజేపీ కార్యకర్తలను, పోలీసులను చంపిన వారికి అవార్డులు ఎలా ఇస్తామని అన్నారు. తమ కార్యకర్తలను చంపిన వ్యక్తులపై ఆయన పాటలు పాడారని.. మరి అలాంటి వ్యక్తికి పద్మ అవార్డు ఎలా ఇస్తామని సంచలన వ్యాఖ్యలు చేశారు.
పద్మ అవార్డులకు ప్రతిపాదనల అంశంలో రాష్ట్ర ప్రభుత్వం అన్నీ ఆలోచించి పంపాలని కేంద్రమంత్రి అన్నారు. నక్సల్స్ భావజాలమున్న గద్దర్ వందలాది మంది బీజేపీ కార్యకర్తల చావులకు కారణమయ్యారన్నారు. అలాంటి వ్యక్తికి పద్మ అవార్డు ఎందుకు ఇవ్వాలని పేర్కొన్నారు. తెలంగాణ భావోద్వేగాన్ని మరోసారి రగిలించి కాంగ్రెస్, బీఆర్ఎస్ పార్టీలు మరోసారి లబ్ది పొందాలని చూస్తున్నాయన్నారు. కేంద్ర పథకాలకు పేర్లు మార్చే అంశంపై మరోసారి బండి సంజయ్ కీలక వ్యాఖ్యలు చేశారు. కేంద్ర సంక్షేమ పథకాల పేర్లను మార్చితే ఊరుకునేది లేదని హెచ్చరించారు.
బండి సంజయ్ వ్యాఖ్యలపై టీపీసీసీ ప్రధాన కార్యదర్శి అద్దంకి దయాకర్ తీవ్ర విమర్శలు చేశారు. ఆయన వ్యాఖ్యలను తీవ్రంగా ఖండించారు. తెలంగాణ ఉద్యమానికి నాయకత్వం వహించి, తెలంగాణ గళం అయిన గద్దర్ నక్సలైట్ లాగా కనిపిస్తున్నారా అని ప్రశ్నించారు. గద్దర్‌పై బండి సంజయ్ వ్యాఖ్యలు బాధ్యతారహితం అన్నారు. బీజేపీ మూల్యం చెల్లించుకోక తప్పదని హెచ్చరించారు. రాష్ట్రం నుంచి ఇద్దరిని కేంద్ర మంత్రులను చేస్తే ఉపయోగం ఏముందని ప్రశ్నించారు. భవిష్యత్తులో బీజేపీ పార్టీని ప్రజలు చెత్తబుట్టలో వేయడం ఖాయమన్నారు.
మరో నేత, మాజీ ఎమ్మెల్యే క్రాంతి కిరణ్ సైతం మండిపడ్డారు. తెలంగాణ ఉద్యమంలో అందరినీ కలుపుకుని ముందుకు తీసుకెళ్లిన వ్యక్తి గద్దర్ అని అన్నారు. RSS నుంచి RSU వరకు అన్ని ఐడియాలజీలు కలిగిన వ్యక్తులు..తెలంగాణ ఉద్యమంలో కలిసి వచ్చే విధంగా కార్యాచరణ రూపొందించిన వ్యక్తి గద్దర్ అన్నారు. అలాంటి వ్యక్తిపై బండి సంజయ్ వ్యాఖ్యలు చేయడం దారుణమన్నారు. తెలంగాణ బిల్లు సమయంలో అనేక సార్లు సుష్మాస్వరాజ్‌తో గద్దర్ సంప్రదింపులు జరిపారన్నారు. చరిత్ర తెలియని మూర్ఖుడిగా సంజయ్ మాట్లాడొద్దని హితువు పలికారు.
పద్మ పుర‌స్కారాల్లో తెలంగాణ‌కు అవ‌మానం జ‌రిగింద‌ని..సీఎం రేవంత్ రెడ్డి అన్నారు. రాష్ట్ర ప్రభుత్వం ప్రతిపాదించిన గద్దర్, చుక్కా రామ‌య్య, అందెశ్రీ, గోర‌టి వెంక‌న్న, జ‌య‌ధీర్ తిరుమ‌ల‌రావు వంటి ప్రముఖుల‌ను కేంద్ర ప్రభుత్వం ప‌రిగ‌ణ‌న‌లోకి తీసుకోక‌పోవ‌డం బాధాకరం అన్నారు. ఇది ముమ్మూటికీ తెలంగాణ ప్రజ‌ల‌ను అవ‌మానించ‌డ‌మేన‌ని సీఎం అసంతృప్తి వ్యక్తం చేశారు. మంత్రులు, అధికారుల‌తో జ‌రిగిన స‌మావేశంలో ఈ అంశంపై రేవంత్‌రెడ్డి చ‌ర్చించారు.
పద్మ పుర‌స్కారాల్లో రాష్ట్రానికి జ‌రిగిన అన్యాయంపై ప్రధాన‌మంత్రి న‌రేంద్ర మోదీకి లేఖ రాయాల‌నే యోచ‌న‌లో సీఎం ఉన్నారు. తెలంగాణ స‌మాజానికి వివిధ రంగాల్లో విశిష్ట సేవ‌లు అందించిన వారిని గుర్తించ‌క‌పోవ‌డం రాష్ట్ర ప్రజ‌ల ఆత్మగౌర‌వానికి భంగం క‌లిగించడ‌మేన‌ని పేర్కొన్నారు. 139 మందికి పుర‌స్కారాలు ప్రక‌టించిన కేంద్ర ప్రభుత్వం రాష్ట్రానికి క‌నీసం ఐదు పుర‌స్కారాలు ప్రకటించ‌క‌పోవ‌డంపై ఆయన అసహనం వ్యక్తం చేశారు. బండి సంజయ్ వ్యాఖ్యలు రాజకీయం దుమారం రేపుతున్నాయి. గద్దర్‌పై ఆయన చేసిన వ్యాఖ్యలను కాంగ్రెస్ తీవ్రంగా ఖండిస్తోంది. దీంతో రాను రాను ఈ అవార్డుల పంచాయతీ ఎటుదారి తీస్తుందో చూడాలి.