స్వతంత్రటీవీ, వెబ్ డెస్క్: కర్నూలు నగరంలోని విశ్వ భారతి ఆసుపత్రిలో వైసీపీ ఎంపీ వైఎస్‌ అవినాష్‌రెడ్డి తన తల్లి శ్రీలక్ష్మితో పాటు చేరారు. ఈ ఉదయం శ్రీలక్ష్మికి ఛాతీనొప్పి రావడంతో పులివెందులలోని ఈసీ గంగిరెడ్డి ఆసుపత్రిలో చికిత్స అందించారు. డాక్టర్లు మెరుగైన వైద్యం అందించాలని కోరగా.. అక్కడి నుంచి అంబులెన్స్‌లో హైదరాబాద్‌ తరలించాలని భావించారు. ఈ క్రమంలో సీబీఐ విచారణకు హాజరుకావాల్సిన అవినాష్‌రెడ్డి.. వెంటనే పులివెందుల బయలుదేరి వెళ్లారు. మార్గ మద్యంలో తాడిపత్రి మండలం చుక్కలూరు వద్ద శ్రీలక్ష్మి ప్రయాణిస్తున్న అంబులెన్స్‌ అవినాష్‌కు ఎదురైంది. ఆ వెంటనే వాహనం దిగిన అవినాష్.. తన తల్లిని చూడడానికి వెళ్లారు. ఆమె ప్రయాణిస్తున్న అంబులెన్స్‌ లో ఎక్కి హైదరాబాద్‌ వైపు బయలుదేరారు. తన తల్లికి పరిస్థితి ఇబ్బందిగా మారడంతో కర్నూలు నగరంలోని విశ్వభారతి ఆసుపత్రికి తరలించి చికిత్స అందిస్తున్నారు. ఈ క్రమంలో అవినాష్ రెడ్డికి కూడా ఛాతీలో సమస్య తలెత్తిందని అదే హాస్పిటల్ లో చేరినట్లు తెలుస్తోంది. అయితే ఆయన ఆరోగ్య పరిస్థితి బాగానే ఉందని అవినాష్‌కు వైద్య పరీక్షలు నిర్వహించిన వైద్యులు చెప్పినట్టు తెలుస్తోంది.