లోక్ సభ ఎన్నికల్లో బీజేపీకి పరోక్షంగా బీఆర్ఎస్ సహకరించిందా? గెలుపు అవకాశాలు గులాబీ పార్టీకి కాస్త కష్టమేనన్న అంచనాల మధ్య కారు పార్టీ లోపాయికారిగా కమలం పార్టీకే తమ ఓట్లు పడేలా వ్యూహరచన చేసిందా? ఇప్పటికే బీజేపీ, బీఆర్ఎస్ ఒకటేనని కాంగ్రెస్ పార్టీ విమర్శలు గుప్పిస్తున్న వేళ.. ఇందులో ఎంత మేరకు వాస్తవం ఉంది. శత్రువుకు, శత్రువు మనకు మిత్రుడేనన్న సామెతను కారు పార్టీ నేతలు ఫాలో అయ్యారా? అసలు బీఆర్ఎస్ ఎందుకిలా చేసింది? ఇందులో ఏదైనా మతలబు ఉందా లేదంటే దీర్ఘకాలిక వ్యూహం ప్రకారమే బీఆర్ఎస్ ఇలా చేసిందా?
తెలంగాణలో అసెంబ్లీ ఎన్నికలు కావచ్చు. లేదంటే లోక్‌సభ ఎన్నికలు కావచ్చు. ఎలక్షన్ ఏదైనా కామన్‌గా విన్పించిన మాట బీజేపీ, బీఆర్ఎస్ ఒకటేనని. ఈ మేరకు కాంగ్రెస్ పార్టీ అగ్రనేతలు మొదలు. చిన్న స్థాయి నాయకుడి వరకు ఎవరినోట విన్నా ఇదే మాట. పైకి విమర్శలు గుప్పించినా, లోలోన బీజేపీ, బీఆర్ఎస్ నేతలు ఒకటేనని ఎన్నో ఆరోప ణలు గుప్పించారు హస్తం నాయకులు. అయితే, అటు బీజేపీ నేతలు, ఇటు బీఆర్ఎస్ లీడర్లు ఈ ప్రచారాన్ని గట్టిగానే తిప్పికొట్టారు. ఈ క్రమంలోనే ఢిల్లీ లిక్కర్ స్కాంలో బీఆర్ఎస్ ఎమ్మెల్సీ కవిత కూడా అరెస్ట్ కావడంతో బీజేపీ, బీఆర్ఎస్ రెండూ ఉప్పూ, నిప్పు మాదిరిగా ఉంటాయన్న విషయాన్ని ఇరు పార్టీల నేతలు ప్రస్తావించారు.
అయితే అవన్నీ కాస్త పక్కన పెడితే శతృవుకు, శతృువు మనకు మిత్రుడేనన్న సామెత లోక్‌సభ ఎన్నికల్లో కన్పించిందన్న వాదన బలంగా విన్పిస్తోంది. తెలంగాణ శాసనసభ ఎన్నికల్లో ఓడిపోవడంతో బీఆర్ఎస్ అధికారాన్ని కోల్పోయింది. దీనికితోడు సీఎం రేవంత్ రెడ్డి ఆపరేషన్ ఆకర్శ్ ప్రారంభించడంతో గులాబీ పార్టీ ఆత్మరక్షణలో పడిపోయింది. ఒకరి తర్వాత మరొకరు అన్నట్లుగా పలువురు కీలక నేతలు కారు దిగి హస్తం గూటికి చేరారు. దీంతో బీఆర్ఎస్ బలహీనంగా మారిపోయింది. ఆ ఫలితం లోక్‌సభ ఎన్నికల్లో స్పష్టంగా కన్పించింది. పార్టీ తరఫున పోటీ చేసేందుకు గట్టి అభ్యర్థులు అన్ని స్థానాల్లో దొరకని పరిస్థితి. పైగా అధికార పక్షంగా కాంగ్రెస్ పార్టీకి అడ్వాంటేజీ ఉండడం గులాబీ పార్టీకి మైనస్‌గా మారింది. ఇలాంటి పరిస్థితుల్లో శతృవుకు, శతృవు మనకు మిత్రుడేనన్న సామెతను కారు పార్టీ ఫాలో అయినట్లే కన్పిస్తోంది. పైకి లోక్‌సభ ఎన్నికల్లో గెలుపు మాదేనని బీఆర్ఎస్ నేతలు చెబుతున్నా, క్షేత్రస్థాయిలో ఆ పార్టీకి పరిస్థితు లు ఏమంత అనుకూలం లేవన్న మాట విన్పిస్తోంది. ఇప్పటికే వివిధ రకాల సర్వేల్లో పలు నివేదికలు గులాబీ బాస్ చేతికి సైతం చేరినట్లు ప్రచారం సాగుతోంది. దీంతో ఎన్నికలకు ముందుగానే ఆ విషయాన్ని గమనించి. తమ ఓట్లు వ్యూహాత్మకంగా బీజేపీకి దఖలు పడేలా అంతర్గతంగా కారు పార్టీ నేతలు పావులు కదిపారన్న ప్రచారం సాగుతోంది. తాము ఎలాగూ విజయం సాధించే పరిస్థితులు లేక పోవడంతో బీజేపీకి ఓట్లు పడేలా చేస్తే భవిష్యత్‌లో కమలంతో లోపాయికారిగా ఉపయోగం ఉంటుం దన్న ఆలోచన బీఆర్ఎస్ అగ్రనేతలు చేసినట్లు రాజకీయ వర్గాల్లో ప్రచారం సాగుతోంది. అదే సమయం లో తమ ఓట్లు హస్తానికి ఎట్టి పరిస్థితుల్లోనూ పడొద్దన్న వ్యూహం కూడా ఇందులో దాగుందన్న మాట విన్పిస్తోంది.
ఈ లోపాయికారీ మేళ్ల వల్ల ఎప్పటిదాకో కాదు. త్వరలోనే స్థానిక సంస్థల ఎన్నికల్లోనే లాభపడాలని కారు పార్టీ యోచిస్తున్నట్లు సమాచారం. త్వరలోనే తెలంగాణలో సర్పంచ్‌లు, ఎంపీటీసీలు, జెడ్పీటీసీ ఎన్నికలు జరగనున్నాయి. ఇప్పటికే ఇందుకు సంబంధించిన ఏరాట్లు మొదలయ్యాయి. దీంతో పంచాయతీ ఎన్నికల్లో విజయం సాధించడం ద్వారా క్షేత్రస్థాయిలో పట్టు నిలుపుకోవచ్చని భావిస్తోంది గులాబీ పార్టీ. అయితే గ్రామాల్లో బీజేపీకి పెద్దగా క్యాడర్ లేకపోవడంతో వారి ఓట్లు గులాబీ పార్టీకి దఖలు పడేలా వారితో లోపాయికారిగా ఓ అవగాహనకు రావచ్చని భావిస్తు న్నట్లు సమాచారం. పైగా పార్లమెంటు ఎన్నికల్లో సహకరించడం ద్వారా రాబోయే రోజుల్లో వారి నుంచి తగినంత సహకారం అందుతుందన్న అంచనాకు కారు పార్టీ నేతలు వచ్చారన్న ప్రచారం సాగుతోంది. పైకి ఎవరికి వారు లోపాయికారీ అవగా హనా, సహకారం లేదని చెప్పినా క్షేత్రస్థాయిలో మాత్రం జరిగింది ఇదేనని రాజకీయ వర్గాల్లో జోరుగా ప్రచారం సాగుతోంది. మరి, రాబోయే రోజుల్లో ఏం జరగబోతోంది. అన్నది తెలియాలంటే స్థానిక సంస్థల ఎన్నికల వరకు ఆగాల్సిందే.