స్వతంత్ర వెబ్ డెస్క్: ఘోస్ట్ సినిమాతో దర్శకుడిగా ప్రవీణ్ సత్తారు ఫ్లాప్ అయ్యాడు. గని సినిమాతో వరుణ్ సైతం డీలా పడ్డారు. ఇలా ఈ ఇద్దరూ కలిసి గాండీవధారి అర్జున అనే సినిమాతో వస్తుండటంతో ప్రేక్షకుల్లో మంచి అంచనాలే ఏర్పడ్డాయి. టీజర్, ట్రైలర్ కూడా ఆసక్తిని పెంచేశాయి. మరి ఈ చిత్రం నేడు ప్రేక్షకుల ముందుకు వచ్చింది. ఈ మూవీ కథ, కథనాలు ఏంటి? ఎలా ఉందనేది ఓ సారి చూద్దాం.
భారత్‌కు చెందిన పర్యావరణ శాఖ మంత్రి ఆదిత్య రాజ్ (నాజర్) లండన్‌లో జరిగే యూఎన్ క్లైమేట్ సమావేశాలకు వెళ్తాడు. మంత్రి పీఏగా ఐరా (సాక్షి వైద్య) ఉంటుంది. అక్కడ యూనివర్సిటీకి చెందిన ఓ అమ్మాయి మంత్రిని కలిసి ‘ఫైల్ 13’ గురించి చెప్పాలని అనుకుంటుంది. ఆ ‘ఫైల్ 13’ కోసం క్లీన్ అండ్ గ్రీన్ (సీ అండ్ జీ)కంపెనీ అధినేత రణ్వీర్ (వినయ్ రాయ్) ప్రయత్నిస్తాడు. తన కంపెనీ సీక్రెట్లు అందులో ఉండటంతో దాన్ని చేజిక్కించుకోవాలని ప్రయత్నిస్తాడు. అసలు ఆ ఫైల్‌లో ఏముంది? రణ్వీర్‌కు మంత్రికి ఉన్న సంబంధం ఏంటి? ఈ కథలోకి అర్జున్ వర్మ (వరుణ్ తేజ్) ఎలా వస్తాడు? అర్జున్ వర్మ, ఐరా (సాక్షి వైద్య)కి ఉన్న రిలేషన్ ఏంటి? చివరకు అర్జున్ వర్మ ఏం చేశాడు? అనేది కథ.
అసలు హీరో చేసేది ఏ పని.. ఏ డిపార్ట్మెంట్.. ఆర్మీ, రా.. ప్రైవేట్ ఏజెన్సీ ఇలా ఏంటన్నది కూడా క్లారిటీగా అనిపించదు. చాలా చోట్ల క్లారిటీ మిస్ అయినట్టుగా అనిపిస్తుంది. ఈ సినిమా కోసం ప్రవీణ్ సత్తారు ఎంచుకున్న పాయింట్ ఆలోచింపజేసేదే అయినా.. తెరపై ఆకట్టుకునేలా, అందరూ మెచ్చేలా, ప్రశంసించే సినిమాగా మాత్రం మలచలేకపోయినట్టు అనిపిస్తుంది. టెక్నికల్‌గా ఈ సినిమా మెప్పిస్తుంది. మిక్కీ పాటలు గుర్తుండకపోయినా ఆర్ఆర్ ఆకట్టుకుంటుంది. కెమెరా వర్క్ బాగుంది. చేజింగ్ సీన్లు బాగా అనిపిస్తాయి. తక్కువ నిడివి కలిసి వస్తుంది. సినిమా కోసం నిర్మాతలు బాగానే ఖర్చు పెట్టినట్టుగా అనిపిస్తుంది.