స్వతంత్ర, వెబ్ డెస్క్: యంగ్ రెబల్ స్టార్ ప్రభాస్ రాముడిగా నటించిన ‘ఆదిపురుష్’ చిత్రం వరుస వివాదాల్లో చిక్కుకుంటోంది. భారీ బడ్జెట్తో తెరకెక్కిన ఈ చిత్రంపై ఎన్నో అంచనాలు ఉన్నాయి. మరోవైపు ఈ చిత్రంలో రాముడి పాత్రను పోషించిన ప్రభాస్ లుక్‌పై విమర్శలు ఎక్కువైపోతున్నాయి. రాముడికి మీసాలు పెట్టడంపై హిందూ సంఘాలతో పాటు పలువురు సినీ క్రిటిక్స్ మండిపడుతున్నారు. తాజాగా సీనియర్ నటి కస్తూరి కూడా దీనిపై స్పందించారు.
ప్రభాస్ లుక్ చూస్తుంటే రాముడిలా లేరని, కర్ణుడిలా ఉన్నారని ఎద్దేవా చేశారు. హిందువులు ఎంతో పవిత్రంగా భావించే రాముడిని, లక్ష్మణుడిని మీసాలతో చూపించడం ఏమిటని ప్రశ్నించారు. తెలుగు సినిమాల్లో ఎంతో మంది నటులు రాముడి పాత్రల్లో తెరపై చాలా అందంగా కనిపించారని.. కానీ ప్రభాస్ మాత్రం మీసాలు పెట్టి రాముడి అందాన్ని తగ్గించారని పేర్కొన్నారు. అయితే ఈ వ్యాఖ్యలపై ప్రభాస్ ఫ్యాన్స్ ఆగ్రహం వ్యక్తం చేస్తుండగా.. కొందరు నెటిజన్లు మాత్రం కస్తూరిని సమర్థిస్తున్నారు.