కమలా హారిస్ ….ప్రస్తుతం అమెరికాలో మార్మోగుతున్న పేరు. కమలా హారిస్ ప్రస్తుతం అమెరికా ఉపాధ్యక్షురాలిగా ఉన్నారు. ఈ నవంబరులో అమెరికా అధ్యక్ష పదవికి ఎన్నికలు జరగబోతున్నాయి. ఈ నేపథ్యంలో డెమొక్రటిక్ పార్టీ తరఫున అభ్యర్థిత్వం కోసం ప్రస్తుత అధ్యక్షుడు జో బైడెన్ తీవ్రంగా ప్రయత్నిస్తున్నారు. అయితే జో బైడెన్ జ్ఞాపకశక్తి ఆయనకు ప్రధాన అడ్డంకిగా మారింది. జో బైడెన్ జ్ఞాపకశక్తి తగ్గిందని చెప్పే సంఘటనలు ఇటీవల అనేకం జరిగాయి. అంతేకాదు జో బైడెన్ వయసు కూడా ఆయనకు మరో మైనస్ పాయింట్‌గా మారింది. బైడెన్ ప్రస్తుతం ఎనభైల్లో ఉన్నారు. అమెరికా లాంటి అగ్రరాజ్యానికి ఎనభైల్లో ఉన్న వ్యక్తి అధ్యక్షుడిగా పనికివస్తారా అనే ప్రశ్న తెరమీదకు వచ్చింది.
ఇదొక్కటే కాదు…జో బైడెన్ మెడకు రహస్య పత్రాల కుంభకోణం కూడా చుట్టుకుంది. రహస్య పత్రాల కుంభకోణంతో అమెరికా సమాజంలో కొంతకాలంగా జో బైడెన్ పొలిటికల్ గ్రాఫ్ పడిపోతోంది. అమెరికా రాజకీయాల్లో దుమారం రేపిన రహస్య పత్రాల అంశం జో బైడెన్ ఇమేజ్ ను ఘోరంగా దెబ్బ‌తీసింది. బారక్ ఒబామా అధ్యక్షుడిగా ఉన్న సమయంలో ఉపాధ్యక్షుడి గా జో బైడెన్ పనిచేశారు.అల‌నాటి స‌ర్కార్ వ్యవహారాలకు సంబంధించిన కీలక సమాచారాన్ని పొందుపర చినవే ఇప్పుడు హాట్ టాపిక్ గా మారిన సీక్రెట్ డాక్యుమెంట్స్ . అమెరికాలో ఏ ప్ర‌భుత్వం అధికారంలో ఉన్నా ఆ ఐదేళ్ల కాలంనాటి కీలక సమాచారాన్ని రహస్య పత్రాల్లో పొందుపరుస్తారు. అమెరికా అధ్యక్షుడు, ఉపాధ్యక్షుడు తదితర ఉన్నత స్థాయిలో ఉన్న అతి కొద్ది మందికి మాత్రమే రహస్యపత్రాలు అందుబాటులో ఉంటాయి. అధ్యక్షుడు, ఉపాధ్యక్షుడు ఎవ‌రైనా తమ పదవీకాలం పూర్తికాగానే వాటిని అమెరికా జాతీయ ఆర్కైవ్స్ కు అప్పగిస్తారు. అమెరికా ప్ర‌భుత్వాల ర‌హ‌స్యాల‌ను కాపాడుకోవ‌డానికి దీనినొక నిబంధ‌న‌గా చేశారు.అయితే అంతటి కీలకమైన రహస్య ఫైళ్లు దాదాపు ఏడాదిన్నర కిందట జో బైడెన్ వైస్ ప్రెసిడెంట్ గా ఉన్న‌ప్ప‌టి పాత కార్యాలయాల్లోనూ అలాగే ఆయన నివాసంలోనూ గుట్ట‌లుగుట్ట‌లుగా దొరికాయి. దీంతో వివాదం మొద‌లైంది. జో బైడెన్ కుమారుడు హంటర్ బైడెన్ ల్యాప్‌టాప్‌ ఈ మొత్తం ఎపిసోడ్ లో కీలకంగా మారింది.
హంటర్ బైడెన్ ల్యాప్‌టాప్‌లోని సమాచారాన్ని విశ్లేషించేకొద్దీ అందరూ ఆశ్చర్యపోయే విషయాలు బయటపడ్డాయి. అంతిమంగా, జో బైడెన్ ఉపాధ్యక్ష ప‌ద‌విని అడ్డం పెట్టుకుని అప్ప‌ట్లో ఆయన కుమారుడు హంటర్ బైడెన్ భారీ స్థాయిలో అవినీతికి పాల్ప‌డ్డాడ‌న్న తీవ్ర‌మైన ఆరోప‌ణ‌లు వ‌చ్చాయి. ఇవేమీ ఉత్తుత్తి ఆరోప‌ణ‌లు కావు. ఈ ఆరోప‌ణ‌ల‌ను బ‌ల‌ప‌రిచే అనేక కీలక ఆధారాలు హంటర్ బైడెన్ ల్యాప్‌టాప్‌లో దొరికాయి. ప్ర‌తిప‌క్ష‌మైన రిప‌బ్లిక‌న్ పార్టీకి ఈ సీక్రెట్ డాక్యుమెంట్స్ ఎపిసోడ్ ఒక వ‌రంలా దొరికింది. అధ్యక్ష పదవికి జ‌రిగే ఎన్నికల్లో రహస్య పత్రాల అంశం ఒక కీల‌కాంశంగా మారే అవ‌కాశాలున్నాయంటున్నారు రాజకీయ విశ్లేషకులు. వాస్తవానికి జో బైడెన్ కు అమెరికా సమాజంలో గుడ్‌విల్ ఉంది. వ్య‌క్తిగ‌తంగా నిజాయితీప‌రుడ‌న్న పేరుంది. అయితే కొద్దికాలం కిందట వెలుగుచూసిన రహస్య పత్రాల వ్య‌వ‌హారంతో ఆయన నిజాయితీపై నీలినీడ‌లు క‌మ్ముకున్నాయి. పైపెచ్చు రహస్య పత్రాల బాగోతం 2022లోనే బ‌య‌ట‌ప‌డ్డా మ‌ధ్యంత‌ర ఎన్నికల్లో ల‌బ్ది కోసం ఆ విష‌యాన్ని జో బైడెన్ తొక్కి పెట్టార‌న్న‌ది మరో ఆరోప‌ణ. ఇదంతా స‌గ‌టు అమెరిక‌న్ల‌కు మింగుడుప‌డ‌లేదు. ఈ నేపథ్యంలో జో బైడెన్ పై సొంత పార్టీలోనే వ్య‌తిరేక‌త వ్య‌క్త‌మ‌వుతోంది. జో బైడెన్ ఈసారి ఎన్నికల్లో పోటీ చేస్తే డెమొక్రటిక్ పార్టీకి గెలుపు సాధ్య‌మేనా అనే అనుమానాలు వ‌స్తున్నాయి. జో బైడెన్ కు మ‌రోసారి పోటీ చేయాల‌న్న కోరిక సంగ‌తి ఎలాగున్నా అందుకు డెమొక్రటిక్ పార్టీ నేత‌లు ఏ మేర‌కు అంగీక‌రిస్తార‌న్న‌ది ప్ర‌శ్నార్థ‌క‌మే. దీంతో జో బైడెన్‌కు ఈసారి డెమొక్రటిక్ పార్టీ తరఫున అభ్యర్థిత్వం లభిస్తుందా అనే ప్రశ్న కూడా తెరమీదకు వచ్చింది.
ఇదిలా ఉంటే …అవసరమైతే అధ్యక్ష పదవి చేపట్టడానికి తాను సిద్ధంగా ఉన్నట్లు ఉపాధ్యక్షురాలు కమలా హారిస్ చేసిన ప్రకటన దుమారం రేపింది. తన సామర్థ్యం గురించి అమెరికా సమాజానికి తెలుసునని కమల పేర్కొన్నారు. దీంతో జ్ఞాపకశక్తి, వృద్ధాప్యం, రహస్య పత్రాల ఎపిసోడ్…అన్నీ బైడెన్‌కు మైనస్ పాయింట్లుగా మారుతాయి. ఈ నేపథ్యం లో జో బైడెన్ కు ఈసారి టికెట్ దొరకదన్న ఊహాగానాలు అమెరికా రాజకీయ వర్గాల్లో దుమారం రేపుతున్నాయి. అదే జరిగితే కమలా హారిస్ కు డెమొక్రటిక్ పార్టీ తరఫున అధ్యక్షురాలిగా పోటీ చేసే అవకాశం లభిస్తుందన్న ఊహాగానాలు సైతం హల్‌చల్ చేస్తున్నాయి.
ఇంతకీ ఎవరీ కమలా హారిస్ ? జమైకా నుంచి వెళ్లి అమెరికాలో స్థిరపడిన డోనాల్డ్ హారిస్, మన తమిళ ఆడపడుచు శ్యామలా గోపాలన్ దంపతులకు కమలా హారిస్ జన్మించారు. కమలా హారిస్ వృత్తిరీత్యా న్యాయవాది, మంచి వక్త. 2020లోఅగ్రరాజ్యమైన అమెరికా ఉపాధ్యక్షురాలిగా ఎన్నికయ్యారు. గతంలో ఏ మహిళకూ సాధ్యం కాని రికార్డును కమలా హారిస్ సొంతం చేసుకున్నారు. ఇప్పటివరకు అమెరికాలో అంత అత్యున్నత స్థాయి పదవికి ఎన్నికైన తొలి భారతీయ సంతతికి చెందిన మహిళగా కమలా హారస్ రికార్డు సృష్టించారు.కమలా హారిస్‌కు మరో రికార్డు ఉంది. అమెరికా ఉపాధ్యక్ష పదవికి ఎన్నికైన తొలి సౌత్ ఆసియన్-అమెరికన్ మహిళ కూడా కమలాయే. అయ్యారు. కాలిఫోర్నియా అటార్నీ జనరల్‌గా పనిచేసిన అనుభవం కమల స్వంతం. అంతేకాదు కాలిఫోర్నియా రాష్ట్రం నుంచి సెనెటర్‌గా ఎన్నికైన మూడవ మహిళగా కూడా కమల తన పేరు నమోదు చేసుకున్నారు. రాజకీయాల్లో ఎప్పుడు ఏమైనా జరగొచ్చు అంటారు పెద్దలు. అమెరికా కూడా ఇందుకు మినహాయింపు కాదు. ఈసారి జో బైడెన్‌ను డెమొక్రటిక్ పార్టీ వద్దనుకోవడానికి అనేక కారణాలున్నాయి. ఈ నేపథ్యంలో ఈసారి ఇండో అమెరికన్ కమలా హారిస్‌కు డెమొక్రటిక్ పార్టీ అభ్యర్థిత్వం దొరకవచ్చు. అదే జరిగితే ఈసారి నవంబర్ ఎన్నికల్లో డెమొక్రటిక్ పార్టీ తరఫున మన తమిళ ఆడపడుచు కమలా హారిస్ పోటీ చేసే అవకాశాలు పుష్కలంగా ఉన్నాయంటు న్నారు రాజకీయ విశ్లేషకులు.