ధరణి పోర్టల్ పునర్నిర్మాణ కమిటీ ఇవాళ తన మధ్యంతర నివేదికను ప్రభుత్వానికి సమర్పించనుంది. వివిధ ప్రభుత్వ శాఖలు, రెవెన్యూ వర్గాలు, పోర్టల్ నిర్వహణ కంపెనీలతో ప్రాథమికంగా జరిపిన చర్చల అనం తరం రూపొందించిన ప్రాథమిక స్థాయి నివేదికను రెవెన్యూ మంత్రి పొంగులేటి శ్రీనివాసరెడ్డికి సమర్పించే అవకాశమున్నట్లు సమాచారం. సచివాలయంలో స్టాంపులు, రిజిస్ట్రేషన్ల శాఖ, TSIICతో కమిటీ భేటీ ముగిసిన తర్వాత మంత్రికి నివేదికను సమర్పించనున్నట్టు అధికార వర్గాలు తెలిపాయి. వాస్తవానికి జిల్లాలకు వెళ్లి క్ష్రేత్రస్థాయిలో వస్తున్న సమస్యలను తెలుసుకున్న తర్వాత మధ్యంతర నివేదిక ఇవ్వాలని సభ్యులు భావిం చారు. కానీ ఈ నెల 8 నుంచి అసెంబ్లీ సమావేశాలు ప్రారంభం కానుండటంతో ఇవాళే సమర్పించాలని నిర్ణయిం చుకున్నట్లు సమాచారం. అసెంబ్లీ సమావేశాల్లో ఈ నివేదికపై కూడా చర్చించే అవకాశముంది. ధరణిపై అసెంబ్లీ సమావేశాల్లో చర్చిస్తామని రెవెన్యూ మంత్రి పొంగులేటి చెప్పారు. ఈ నేపథ్యంలో కమిటీ సమర్పించే నివేదికపై సర్వత్ర ఉత్కంఠ నెలకొంది.